مينيسترلىك «سومكەمدە بومبا بار» دەگەن ەلشىنىڭ قالجىڭىنا تۇسىنىك بەردى

استانا. قازاقپارات - ق ر سىرتقى ىستەر ءمينيسترىنىڭ ءبىرىنشى ورىنباسارى مۇحتار تىلەۋبەردى استانا اۋەجايىندا «سومكەمدە بومبا بار» دەگەن قالجىڭى ءۇشىن ۇستالعان اۋعانستان ەلشىسىنىڭ ارەكەتىنە تۇسىنىكتەمە بەردى، دەپ حابارلايدى قازاقپارات ءتىلشىسى.

«ەندى، ول ارەكەت دورەكىلەۋ بولدى. ەلشى مىرزا كەدەنشىلەردىڭ «سومكەدە نە بار؟» دەگەن سۇراعىنا «بومبا بار» دەپ جاۋاپ قايتارعان. البەتتە، ارنايى ورگان قىزمەتكەرلەرى بىردەن تەرگەۋگە كىرىستى. تەكسەرىستەن كەيىن ونىڭ ءسوزى راستالعان جوق. سوسىن ءوزىنىڭ ەلشى ەكەنى انىقتالدى. ءسويتىپ، بارلىعى سول جەردە شەشىلدى. ال ەلشى الماتىعا ۇشىپ كەتتى. ەندى، كەز كەلگەن ديپلومات ءوزى جۇرگەن مەملەكەتتىڭ زاڭدارىنا قۇرمەتپەن قاراۋى ءتيىس. قاراپايىم ەتيكەت ەرەجەلەرىن ساقتاۋ قاجەت. سوندىقتان ونىڭ ارەكەتى دورەكىلەۋ بولدى»، - دەدى تىلەۋبەردى جۋرناليستەرگە بەرگەن سۇحباتىندا.

ۆيتسە-ءمينيستردىڭ سوزىنە قاراعاندا، باس كەزىندە كەدەنشىلەر ول ادامنىڭ ەلشى ەكەنىن بىلمەدى. تەكسەرىس كەزىندە عانا ونىڭ ديپلومات ەكەنى انىقتالدى.

ايتا كەتەيىك، استانا اۋەجايى اۋعانستان يسلام رەسپۋبليكاسىنىڭ بۇرىنعى ەلشىسى موحامماد فارۋك باراكيدىڭ ۇستالعانى جايىندا حابارلادى. ونىڭ ورنىنا وسى ەلدىڭ ۇلتتىق ارمياسىن باسقارعان كادام شاح شاحيم تاعايىندالدى. الايدا بۇرىنعى ەلشى باراكيدى استانا اۋەجايىندا تەكسەرگەندە ول ءالى دە ەلشى قىزمەتىندە بولعان.

اۆتور: ارمان اسقاروۆ