قۇسبەگى باقىتجان ءجۇنىسوۆتىڭ قولىنان شىققان ات ابزەلدەرى تاڭداي قاقتىردى - فوتو

استانا. قازاقپارات - پاۆلودارداعى ورتالىق الاڭدا كەشە ۇيىمداستىرىلعان ناۋرىز مەرەكەسىنە كەلگەن جۇرت باياناۋىلدىق قۇسبەگى باقىتجان ءجۇنىسوۆتىڭ قولىنان شىققان ات ابزەلدەرى بۇيىمىن قىزىعا تاماشالادى.

بەلگىلى قۇسبەگى باقىتجان ءجۇنىسوۆ باياناۋىل اۋدانى جۇمات شانين اۋىلىندا تۇرادى، دەپ حابارلايدى pavlodarnews.kz.

ناۋرىز مەرەكەسىنە ارنالعان كورمەگە ءوزى جاساعان ەردىڭ ءۇش ءتۇرىن، نوقتا، جۇگەن، قامشى، بيشىك جانە وتكىر كەزدىك سىندى اڭشىعا كەرەكتى قۇرال- جابدىقتاردى قويىپتى. سونىمەن قاتار، بۇركىتشى قالا تۇرعىندارى مەن قوناقتارىنا كورسەتۋ ءۇشىن ءوزى اڭعا سالىپ جۇرگەن قارشىعاسى مەن بۇركىتىن جانە اتتارىن دا الا كەلگەن.

ول ەندى قازاقتىڭ وسى كيەلى ونەرىنە توعىز جاسار ۇلىن باۋلىپ جۇرگەنىن جەتكىزدى.



«قۇسبەگىلىك ونەرگە توعىز جاسار ۇلىمدى باۋلىپ ءجۇرمىن. ءبىرىنشى مامىر مەرەكەسىنە جينالعان جۇرتقا اتپەن تەڭگە الۋ، اۋدارىسپاق سەكىلدى ات سپورتى تۇرلەرىن كورسەتەمىز. قازىرگى تاڭدا "ەكسپو-2017" كورمەسىنە كەلگەن شەتەلدىك قوناقتارعا كورسەتۋ ماقساتىندا قايىس بۇيىمدارىنان ات ابزەلدەرىن دايىنداپ جاتىرمىز»، - دەيدى باقىتجان ءجۇنىسوۆ.