الماتىلىقتار سيركتە كوگەرشىندەردىڭ ەرەكشە قاسيەتىنە ءتانتى بولدى - فوتو

الماتى. قازاقپارات - الماتىلىقتار ۇيرەتىلگەن كوگەرشىندەردىڭ ونەرىن كورسەتكەن ەرەكشە سيرك باعدارلاماسىن تاماشالادى، دەپ حابارلايدى قازاقپارات ءتىلشىسى.

اتالعان سيرك ءنومىرى پاريجدە وتكەن سيرك ونەرى بايقاۋىنىڭ گران- پري جۇلدەسىن جەڭىپ العان.

«كوپتەگەن سيرك قويىلىمدارىندا تالىمگەر شاردى ءوز قولىمەن اينالدىرىپ تۇرادى دا وندا وتىرعان كوگەرشىن جۇرۋگە ءماجبۇر بولادى. ال مەن ءوز نومىرىمدە شاردان الىس تۇرامىن دا قۇستاردىڭ وزدەرى ءنومىردى ورىنداپ شىعادى. شاردىڭ ىشىندە 4 كوگەرشىن اينالسا، ۇستىندەگى بىرەۋى دە مەن بۇيرىق بەرمەيىنشە توقتاماي اينالادى»، - دەيدى ەرەكشە ءنومىردىڭ اۆتورى رەسەيلىك ۇيرەتۋشى مارينا كاتايەۆا.

ونىڭ ايتۋىنشا، قۇستاردىڭ ۇيرەنگەنى سونداي ولاردىڭ ءارقايسىسى ءوز ورنىن بىلەدى جانە قاي كەزدە ۇشۋ قاجەتتىگىن ابدەن ۇيرەنگەن. «كوگەرشىندەر وزگە قۇستار سەكىلدى تەز ۇيرەنىپ كەتپەيدى. 10 كوگەرشىننىڭ 2-3-ەۋى وزىنشە قيمىلداپ تريۋككە كونە قويمايدى. سوندىقتان، ولاردى ۇيرەتۋ ءۇشىن بارىنشا جىلىلىق تانىتامىن»، - دەيدى ول. مارينا ءوز سوزىندە قۇستاردان بولەك يتتەر مەن مىسىقتاردى، ايۋ مەن جىرقىش اڭداردى دا سيرك باعدارلاماسىنا كوندىرە الاتىنىن ايتتى.

رەسەيلىك شەبەر قازىرگى ۋاقىتتا يۋري نيكۋلين سيركىنىڭ مەرەيتويلىق باعدارلاماسىمەن كەلىپ، الماتى قالاسىندا ونەر كورسەتىپ جاتىر.

اۆتور: الماس مۇقاش ۇلى