قازاقستاننىڭ مۇناي ءونىمى فينلياندياعا ەكسپورتتالماق

استانا. قازاقپارات - باتىس قازاقستان وبلىسىنداعى «كوندەنسات» ا ق- نىڭ زاۋىتى ءۇ ي ي د باعدارلاماسىنىڭ اياسىندا وتە قىسقا مەرزىم ىشىندە مۇناي ايىرۋ سەكسياسىن ىسكە قوستى.

بۇل تۋرالى قازاقپارات تىلشىسىنە «كوندەنسات» ا ق باس ديرەكتورى ەدۋارد ءجۇنىسوۆ ايتىپ بەردى.

«باتىس قازاقستان وبلىسى ءبورلى اۋدانىنداعى «كوندەنسات» ا ق- نىڭ زاۋىتى وتە قىسقا مەرزىم ىشىندە، ناقتىراق ايتسام، 1 جىل 1 اي ىشىندە مۇنايدى ۆاكۋۋمدا ايىرۋ سەكسياسىنىڭ قۇرىلىسىن اياقتادى.

ەندى جاڭا قۇرىلعى مۇناي ونىمدەرىن قايتا ايىرىپ، شىعارۋعا مۇكىندىك بەرەدى ءارى ءونىمدى ەكسپورتتايدى. ياعني، ەندى قارا ماي ءونىمى مەن گاز مايلى ديزەل وتىنىن قايتا شىعارۋعا مۇمكىندىك بار. بۇل جوبا موتور مايلارىنىڭ ءوندىرىسىن كەڭەيتۋ مەن جاڭعىرتۋ جونىندەگى ينۆەستيتسيالىق جوبانىڭ كەزەكتى كەزەڭى»، - دەيدى ەدۋارد ءجۇنىسوۆ.

باس ديرەكتوردىڭ حابارلاۋىنشا، سەكسيانىڭ قۇرىلىسى ءبىر جىلدىڭ ىشىندە اياقتالعان. ءبىر اي بويى قۇرىلعىنى ىسكە قوسۋ جۇمىستارى اتقارىلعان. سەكسيانىڭ قۇرىلىسىنا 16 شاقىرىم قۇبىر، 1000 توننا مەتالل پايدالانىلعان. قۇرىلعىنىڭ قۋاتتىلىعى - جىلىنا 250 مىڭ توننا قايتا وڭدەلگەن مۇناي ونىمدەرى.

«ۆاكۋۋمدا قايتا ايىرۋ ءادىسىنىڭ ارقاسىندا مۇناي ءونىمىنىڭ قايتا وڭدەۋگە جارايتىن تەرەڭدىگى ۇزارادى، سونداي-اق، ساتىلاتىن ءونىمنىڭ ءتۇرى كوبەيەدى. جاڭادان ىسكە قوسىعان سەكسيادا 1000 توننا قارا ماي ءوندىرىپ ۇلگەردىك. بۇل ءونىمنىڭ نارىقتاعى سۇرانىسى وتە جوعارى، ويتكەنى، جول قۇرىلىسىنا كوپ پايدالانىلادى. سونداي-اق، 2500 توننا ۆاككۋم گاز مايلى ديزەل وتىنىن وندىردىك. بولاشاقتا بۇل ءونىمدى قازاقستاننىڭ كاسىپورىندارىنان تىس، رەسەيگە جانە شەتەلگە شىعارۋدى كوزدەپ وتىرمىز. ال، العاشقى پارتياسى فينلياندياعا ەكسپورتتالادى»، - دەيدى ە. ءجۇنىسوۆ.

جوبانىڭ جالپى قۇنى - 168,6 ميلليون دوللار، ال، قارجىلاندىرعان «قازاقستاننىڭ دامۋ بانكى» ا ق. «بايتەرەك» ا ق- نىڭ ەنشىلەس ۇيىمى سانالاتىن بانك قۇرىلىسقا قاجەتتى قاراجاتتىڭ 70 پايىزىن 11 جىلعا زايمعا بەرگەن.

جوبا 2015-2019-جىلدارعا ارنالعان «ۇدەمەلى يندۋستريالىق-يننوۆاتسيالىق دامۋ» مەملەكەتتىك باعدارلاماسىنىڭ اياسىندا جۇزەگە اسىرىلعان.

اۆتور: رۋسلان عابباسوۆ