مەنى ديماش قۇدايبەرگەن ەتكەن قازاق حالقىنا مىڭ العىس - ديماشتىڭ استاناداعى كونسەرتى
عيماراتقا الدىمەن شاقىرۋ بيلەتتەرى بار كورەرمەندەردى كىرگىزدى. الايدا سىرتتا قالعان حالىق تا ىشكە لاپ بەرىپ، كۇزەتشىلەرگە قاراماي، زالعا كىرىپ كەتتى. ءسويتىپ، «الەم تانىعان ديماش» اتتى مەرەكەلىك شارادا ينە شانشار جەر تابىلمادى، دەپ حابارلايدى قازاقپارات ءتىلشىسى.
سالتاناتتى شارانىڭ باسىندا ق ر مادەنيەت جانە سپورت ءمينيسترى ارىستانبەك مۇحامەدي ۇلى ديماشتىڭ اتا- اجەسىنە شاپان جاۋىپ، قۇرمەت كورسەتتى. ال اقىن جانسايا مۋسينا انشىگە ءوز ارناۋىن جولدادى. شارا بارىسىندا ديماشتىڭ شىعارماشىلىق جولىنا ارنالعان بەينەبايان كورسەتىلىپ، «I am Singer» بايقاۋىنداعى جەتىستىكتەرىنە تاعى ءبىر مارتە شولۋ جاسالدى.
ديماشتىڭ اكەسى - قانات ايتبايەۆتىڭ ايتۋىنشا، ديماشتىڭ العاشقى ايتقان ءانى «اقتوبە» شىعارماسى بولاتىن. بۇگىنگى كونسەرتتە سول ءان ورىندالماسا دا، ديماش اكە- شەشەسىمەن بىرگە «اسىل اناشىم» ءانىن ايتىپ بەردى.
«تۋعان جەرىمنىڭ ىستىق ىقىلاسىن سەزىنۋ وتە ماڭىزدى ەكەنىنە كوزىم جەتتى. وسى ورايدا بارشا الەمگە، بارشا تىڭدارماندارىما، قازىرگى ونەرىمنىڭ تانىلۋىما ەرەكشە سەپتىگىن تيگىزگەن، مەنى ۇلكەن ساحنانىڭ تورىنە شىعارعان، ديماش قۇدايبەرگەن ەتكەن قازاق حالقىما مىڭ دا ءبىر تاعزىم ەتەمىن»، - دەدى ءانشى ءوزىنىڭ ءبىر سوزىندە.
كونسەرت كەزىندە ءانشى ۇشقىن جامالبەك ديماش قۇدايبەرگەنگە ارناپ جازىلعان ءاندى شىرقاپ بەردى. ديماش وعان دا، وزىمەن بىرگە قىتايدا بولعان جان جولداسى الپامىس شەرىموۆكە دە ءوز العىسىن ءبىلدىردى. ارينە، وعان دەيىن ءوزىنىڭ ميۋا اجەسى مەن قۇدايبەرگەن اتاسىنا، سۆەتا اناسىنا، قانات اكەسىنە، بارشا ۇستازدارىنا، ءتىپتى ءوزىنىڭ كۋرستاس دوستارىنا شىن ريزاشىلىعىن جەتكىزدى.
شارانىڭ سوڭىندا ديماش «I am Singer» بايقاۋىندا ورىنداعان «دايديداۋ» ءانىن ورىنداپ بەردى. باسىندا دومبىرامەن كۇي شەرتەمىن دەپ، ءبىر- ەكى رەت جاڭىلىسىپ كەتسە دە، ءازىل ايتىپ، حالىقتىڭ كوڭىلىن كوتەردى. سوسىن ميكروفونىن الىپ، الەمگە تانىلعان «دايديداۋدى» شىرقادى. وسى اننەن كەيىن حالىقتىڭ قوشەمەتى تولاستامادى. وعان كوڭىلى بوساعان ديماش تاعى ءبىر ءاندى ورىندادى. ول دا «I am Singer» بايقاۋىندا شىرقالعان ءان، جاڭا ءان - «ماحاببات بەر».
ال، جۋرناليستەرگە سۇحبات بەرگەن ديماشتىڭ پروديۋسەرى ءارى دوسى الپامىس شەرىموۆ ءانشىنىڭ الداعى جوسپارلارى جايىندا ايتىپ بەردى.
«الدا ۇلكەن جوسپارلار بار. قازىر ول قىتاي ەلىن تاڭقالدىرىپ جاتىر. الداعى ۋاقىتتا ەۋروپانىڭ ەڭ تانىمال ءبىر باعدارلاماسى بار، ونى ازىرشە قۇپيا تۇردە ساقتاي تۇرايىن. سول باعدارلاماسىندا ديماش قۇرمەتتى قوناق رەتىندە الەمنىڭ تانىمال انشىلەرىمەن بىرگە ونەر كورسەتەتىن بولادى. كەلەسى ايدىڭ باس جاعىندا»، - دەدى شەرىموۆ. ونىڭ ايتۋىنشا، قازىرگى كەزدە ءبىر كەلىسىمنىڭ مەرزىمى اياقتالعان جوق. ءبىراق ناقتى قاي كەلىسىم ەكەنىن اشىق ايتپادى. سول قۇجاتتىڭ مەرزىمى اياقتالعان سوڭ، ديماش بۇقارالىق اقپارات قۇرالدارىمەن كەزدەسىپ، كەڭىنەن اڭگىمەلەسە الادى.
اۆتور: ارمان اسقاروۆ