ەكى ميلليون تەڭگەنى يەسىنە قايتارىپ بەرگەن ازاماتقا كومپانيا باسشىسى سىياقى بەردى
شىمكەنتتە جەكە كومپانيالاردىڭ بىرىندە قويما مەڭگەرۋشىسى بولىپ جۇمىس جاسايتىن قۋانىش ناقىپبەكوۆ جۇمىستان قايتىپ بارا جاتىپ، «سايرام» مولتەكاۋدانىندا جول بويىنان ءاميان تاۋىپ العان. ءامياننىڭ ىشىندە ءىرى كولەمدەگى اقشا بار ەكەنىن بايقاپ، دەرەۋ يەسىنىڭ ۆيزيتكاسىن تاۋىپ الىپ، حابارلاسقان، دەپ حابارلايدى Baq.kz.
«جولدا كەتىپ بارا جاتىپ بورسەتكاعا كوزىم ءتۇسىپ كەتتى. تۋرا جولدىڭ ورتاسىندا جاتىر ەكەن. جان-جاعىما قارادىم، ەشكىم جوق. سودان سول ماڭداعى دۇكەنگە كىرەيىن دەپ تۇرعانمىن، ساتۋشىمەن بىرگە بورسەتكانىڭ ىشىنەن يەسىنىڭ ۆيزيتكا نومىرىنە حابارلاستىق. قۋانعانىنان سۇيىنشىسىنە 10 مىڭ تەڭگە بەردى. يەسى ونىڭ ىشىندە 2 ميلليون تەڭگەگە جۋىق قارجىسى مەن قۇجاتتارى بارىن ايتتى. شىنىمدى ايتسام، بورسەتكانى تاۋىپ العانىمدا دەرەۋ ونى جوعالتىپ العان ادامنىڭ جاعدايىن ويلادىم. شارق ۇرىپ ىزدەپ جۇرگەن شىعار دەپ ويلادىم. ىشىندەگىنى ءوز قاجەتتىلىگىمە جاراتۋ دەگەندى ءتىپتى ويلامادىم دا. اللا الدىندا ونىڭ دا جاۋابى بارىن بىلەمىن. مەنىڭ ورنىمدا بولعان كەز كەلگەن سولاي جاسار ەدى دەپ ويلايمىن»، - دەپ اعىنان جارىلدى قۋانىش ناقىپبەكوۆ.
ايتا كەتەرلىگى، شىمكەنتتىك تۇرعىننىڭ بۇل ارەكەتى تۋرالى العاش بولىپ ول جۇمىس ىستەيتىن "Nuray Construction" كومپانياسىنىڭ باسشىسى التاي اينابەك ءوزىنىڭ الەۋمەتتىك جەلىدەگى پاراقشاسىندا ءبولىستى. مۇنى وقىعان جەلى قولدانۋشىلارى ازاماتتىڭ بۇل ارەكەتىن ناعىز ادامگەرشىلىككە بالاپ، اق تىلەكتەرىن جاۋدىردى.
كومپانيا باسشىسى قۋانىش ناقىپبەكوۆكە مەكەمە اتىنان قارجىلاي سىياقى بولاتىنىن دا ۋادە ەتكەن ەدى.
«بۇگىن بۇكىل ۇجىمنىڭ الدىندا قىزمەتكەرىم قۋانىش ناقىپبەكوۆكە قۇرمەت كورسەتتىك. كومپانيا اتىنان 200 مىڭ تەڭگە كولەمىندە سىياقى بەردىك. جالپى قۋانىش ەشكىمگە زيانى جوق، ءوز ىسىنە جاۋاپتى قىزمەتكەرلەرىمنىڭ ءبىرى»، - دەدى التاي اينابەك.