جالدامالى تۇرعىن ءۇي مۇگەدەكتەر مەن جەتىم بالالارعا عانا بەرىلەتىن بولادى. ال قالعان ازاماتتار تۇرعىن ءۇي قۇرىلىس جيناق جۇيەسى ارقىلى كرەديتتىك باسپانا الۋ مۇمكىندىگىنە يە، دەپ حابارلايدى Sputnik قازاقستان ءتىلشىسى.
ەلىمىزدە بىرنەشە جىل بويى الدىمەن وڭىرلەردى دامىتۋ، ودان كەيىن «نۇرلى جول» باعدارلاماسى اياسىندا ساتىپ الۋ قۇقىعىمەن جالدامالى ۇيلەر سالىندى. بۇل ۇيلەردىڭ بارلىعى بيىلعى جىلدىڭ سوڭىنا دەيىن تۇگەل تاپسىرىلىپ، ازاماتتارعا ون بەس جىلعا جالعا بەرىلەدى. وسى ۋاقىتتا ولار باسپانانى مەرزىمىنەن بۇرىن ساتىپ الا الادى. اۋەلى العاشقى بەس جىلدا تۇرعىندار جالداپ وتىرعان ءۇيىن مەنشىگىنە الا المايتىن ەدى، ەندى «نۇرلى جەر» باعدارلاماسىنا ءتيىستى وزگەرتۋلەر ەنگىزىلىپ، باسپانانى ساتىپ الۋ قۇقىعىنا يە بولدى. ال بيىلعى جىلدان باستاپ «نۇرلى جەر» باعدارلاماسى اياسىندا ساتىپ الۋ قۇقىعىنسىز بەرىلەتىن جالدامالى باسپانا سالىنا باستايدى.
قاراجات رەسپۋبليكالىق بيۋدجەتتەن تىكەلەي جەرگىلىكتى اتقارۋشى ورگاندارعا بولىنبەك. ءبىراق بۇل ۇيلەر ءبىرىنشى ساناتتاعى مۇگەدەكتەر مەن جەتىم بالالارعا عانا قاراستىرىلعان. بار بولعانى ولار 500-600 تەڭگە كولەمىندە ەكسپلۋاتاتسيالىق شىعىنداردى عانا وتەيدى. جالپى، رەسپۋبليكا بويىنشا جىل سايىن 3 مىڭ پاتەردەن 15 -جىلدا 45 مىڭ پاتەر تاپسىرىلماقشى. ال قالعان ساناتتاعى ازاماتتار ءۇشىن كرەديتتىك باسپانا سالىنادى. بۇل ۇيلەر تۇرعىن ءۇي قۇرىلىس جيناق جۇيەسى ارقىلى بەرىلەدى. باعدارلاماعا جاۋاپتى مينيسترلىك وكىلىنىڭ ايتۋىنشا، كرەديتتىك تۇرعىن ءۇيدىڭ باعاسى نارىقتاعىدان الدەقايدا ارزان بولادى.
«ەندى 25 جاسقا، 35 جاسقا، جاس وتباسىلارعا دەگەن ءبولىنۋ بولمايدى. تولەۋ مۇمكىنشىلىگى بار جانە تولەۋ مۇمكىنشىلىگى جوق ازاماتتار دەپ قاراستىرىلادى. تولەۋ مۇمكىنشىلىگى جوق ازاماتتار ءۇشىن جالعا بەرىلەتىن، ءبىراق ساتىلمايتىن ۇيلەر، ال تولەۋ مۇمكىنشىلىگى بار تۇرعىندار ءۇشىن كرەديتتىك باسپانا سالىنادى. بۇكىل وڭىرلەردە كرەديتتىك باسپانانىڭ شارشى مەترى 140 مىڭ، تەك استانا، الماتى، اقتاۋ، اتىراۋ قالالارىندا عانا 180 مىڭ تەڭگە بولادى. بۇل ارزان، نارىقتاعى باعا بۇدان جوعارى. مەملەكەتتىڭ كومەگى وسى»، - دەپ اتاپ ءوتتى بۇگىن ماجىلىستە وتكەن وتىرىستا ق ر ينۆەستيتسيالار جانە دامۋ مينيسترلىگىنىڭ قۇرىلىس ىستەرى كوميتەتىنىڭ ءتوراعاسى مارحابات جايىمبەتوۆ.
بۇدان بولەك، مەملەكەتتىك باعدارلاماعا قاتىسۋشىلار ءۇشىن تاعى ءبىر جەڭىلدىك كوزدەلىپ وتىر. «ەكىنشى، پاتەر الۋ ءۇشىن جيناۋ قاجەت قاراجاتتىڭ سوماسىن 50 پايىزدان 30 پايىزعا دەيىن ءتۇسىردى. تاعى دا «نۇرلى جەرگە» وزگەرىس ەنگىزىپ، مەملەكەتتىك باعدارلاما بويىنشا 15 پايىزعا دەيىن ءتۇسىرۋدى قاراستىرىپ جاتىرمىز»، - دەدى ول. بۇل باعىت بويىنشا ەلىمىزدە 15 -جىلدا شامامەن 285 مىڭ وتباسى باسپانالى بولادى.
ايتپاقشى، «نۇرلى جەر» باعدارلاماسىندا باسپانالى بولۋدىڭ باسقا دا جولدارى بار.
ماسەلەن، ازاماتتارعا بۇكىل ينفراقۇرىلىمى تارتىلعان جەر ۋچاسكەلەرى بولىنەدى. بۇدان بولەك، جەڭىلدەتىلگەن يپوتەكا قاراستىرىلعان. ياعني، بانكتىڭ پايىزدىق مولشەرلەمەسىنىڭ جەتى پايىزىن مەملەكەت وتەيدى. ءدال وسىنداي مۇمكىندىك قۇرىلىس كومپانيالارىنا دا جاسالماقشى. وسى جۇمىستاردىڭ ناتيجەسىندە 15 -جىلدا 1,5 ميلليون وتباسى باسپانالى بولادى دەپ جوسپارلانىپ وتىر.
بۇگىنگى كۇنى ەلىمىزدە 2,5 ميلليون ادام باسپاناعا مۇقتاج. 1 ميلليون 300 ادام 10 سوتىق جەر الۋعا، 428 مىڭنان استام ادام اكىمدىكتەردە كەزەكتە تۇر. ال 800 مىڭ ادام - تۇرعىن ءۇي قۇرىلىس جيناق بانكىنىڭ سالىمشىسى.