بۇل تۋرالى ۆكونتاكتە الەۋمەتتىك جەلىسىندە جازىلدى. «بۇل مەنى ەسەڭگىرەتىپ جىبەردى. بىرىنشىدەن، ادام بەينەسىن توسەنىش ەتىپ، تاپتاۋدىڭ ءوزى ادامگەرشىلىككە جاتپايدى دەپ ەسەپتەيمىن. ەكىنشىدەن، قازاقتىڭ العاشقى پەداگوگىنىڭ بەينەسىن كورىپ، نە ىستەرىمدى بىلمەي ابدىراپ قالدىم»، - دەپ جازدى پوست اۆتورى.
سونداي-اق، قازاقستاندىق ستۋدەنت توسەنىشتى كىرەبەرىستەن العىزۋعا بارىنشا تىرىسقانىن جازعان. «ساتۋشىلاردان توسەنىشتەگى بەينەنىڭ كىم ەكەنىن بىلەسىزدەر مە دەپ سۇرادىم، «بىلمەيمىز. قىتايلىق بىرەۋ شىعار...»، دەپ جاۋاپ بەردى.
ولاردىڭ بىرىنە جاعدايدى تۇسىندىرە باستاپ ەدىم، كەلۋشىلەردىڭ كوپ ەكەنىن ايتىپ، مازالاماۋىمدى ءوتىندى. ەكىنشى ساتۋشىعا باردىم، ول مەنىڭ سوزدەرىمە قۇلاق استى. مەنىڭ سوزدەرىمنىڭ راستىعىنا، التىنساريننىڭ ۇلكەن تۇلعا ەكەنىنە كوز جەتكىزۋ ءۇشىن ساتۋشى التىنساريننىڭ سۋرەتتەرىن ينتەرنەتتەن كورسەتۋدى سۇرادى.
ءمان-جايعا قانىق بولعان سوڭ، مەنەن كەشىرىم ءوتىنىپ، توسەنىشتى الىپ تاستاۋعا ۋادە بەردى. وكىنىشكە وراي، ساتۋشى توسەنىشتى مەنىڭ كوزىمشە العان جوق، دۇكەندە حالىق قاراسى كوپ ەدى. كەيىنىرەك دۇكەنگە تاعى دا بارامىن»، - دەپ ءسوزىن تۇيىندەدى ستۋدەنت. جەلى قولدانۋشىلارى التىنسارين پورترەتىنىڭ وڭتۇستىك كورەياعا قالاي جەتكەنىنە تاڭدانىس بىلدىرۋدە.
اۆتور: ايجان سەرىكجان قىزى