بيىل ايتۋلى شارا اياسىندا بۇل شاھاردا قىزعالداقتىڭ 160 تۇرىنەن 26 ميلليون 500 مىڭ داناسى وتىرعىزىلدى.
قالانىڭ كورىكتى ورىندارى، ساياباقتارى مەن جول جيەگى ءتۇرلى-ءتۇستى گۇلگە ورانىپ تۇر، دەپ حابارلايدى 24.kz.
سونداي-اق ءداستۇرلى فەستيۆال شەڭبەرىندە تۋريستەر كوپ كەلەتىن سۇلتان احمەت مەشىتى مەن ايا سوفيا مۇراجايىنىڭ الاڭىندا قىزعالداقتان توقىلعان الەمدەگى ەڭ ۇلكەن كىلەم توسەلدى. ونىڭ جالپى اۋدانى 1453 شارشى مەتردى قۇرايدى. ۇيىمداستىرۋشىلار مۇنى ىستامبۇل قالاسىن جاۋلاپ العان جىلعا ورايلاستىرعان. ءسويتىپ 564 مىڭ قىزعالداق ەگىلگەن.
«ءبىز ءۇشىن قىزعالداق ءجاي وسىمدىك قانا ەمەس، تاريحىمىز بەن مادەنيەتىمىزدە ورنى بولەك ەرەكشە گۇل. سوندىقتان ونى توقىما ونىمدەرى مەن كەراميكالىق بۇيىمداردا، ەبرۋ ونەرىندە ءجيى كەزدەستىرۋگە بولادى. ءتىپتى بىزدە «قىزعالداق» دەگەن ەسىم دە بەرىلەدى. قازىرگى تاڭدا فەستيۆال بۇقارالىق سيپات الىپ، كەڭ كولەمدە تويلانۋدا. بۇل سۇلۋلىقتى تاماشالۋعا قالامىزعا ەلىمىزدىڭ وزگە ايماقتارىنان وتانداستارىمىزبەن قاتار شەت مەملەكەتتەن تۋريستەر ارنايى قىدىرىپ كەلۋدە. بىلتىر ىستانبۇلعا 9 ملن شەتەلدىك تۋريست كەلدى. بيىل ول كورسەتكىش ارتادى دەپ ۇمىتتەنەمىز»، - دەيدى ىستانبۇل قالاسىنىڭ مەرى قادىر توپباش.