ويتكەنى، «ديماش الەمدەگى ەڭ مىقتى پروديۋسەرلىك ورتالىقتاردىڭ بىرىمەن سەگىز جىلعا كەلىسىمشارتقا وتىرماقشى ەكەن» دەگەن دە اقپارات تاراپ جاتىر. ال، ءانشىنىڭ ءوزى قىتايدىڭ تانىمال سايتىنا بەرگەن سوڭعى سۇحباتىندا، جاقىن كۇندەرى «قازاقستاندىقتارعا جەتكىزەر جاقسى جاڭالىعىم بار» دەدى.
بۇل تۋرالى 31 - ارنا حابارلادى.
بۇل بايقاۋ قورىتىندىسى شىققاننان كەيىنگى وتكەن شارا! كەلىسىمشارت بويىنشا، ديماشقا جوبا جايىندا وزگە اقپارات قۇرالدارىنا سۇحبات بەرۋگە تىيىم سالىنعاندىقتان، جەرلەسىمىزدىڭ بايقاۋدان العان اسەرى مەن سالەمىن ۇيالى تەلەفوننىڭ كامەراسىنا ءتۇسىرىپ الىپ، جەتكىزۋگە تۋرا كەلدى.
«ديماش بايقاۋ تۋرالى ءوزىڭنىڭ ويىڭدى ەستىگىمىز كەلىپ وتىر. قانداي سەزىمدەسىڭ؟ » دەگەن ءتىلشى ساۋالىنا ديماش: «وسىنداي، الەمدىك دەڭگەيدەگى ءانشى اپكە اعالارىممەن ءبىر ساحناعا شىعىپ ونەر كورسەتۋ مەن ءۇشىن ۇلكەن مارتەبە» ، - دەپ جاۋاپ بەردى.
ديماش وسى شوۋ ارقىلى قازاق ونەرىن الەمگە تانىتتى. ميلليونداعان جانكۇيەر جينادى. ەڭ باستىسى، مەن سياقتى جاستارعا جاعداي جاساعان ەلباسىعا ريزامىن دەپ اياقتادى ءسوزىن.
«الەمنىڭ تۇكپىر- تۇكپىرىندە ونەر كورسەتۋىمىزگە ەرەكشە مۇمكىندىك بەرگەن نۇرسۇلتان ءابىش ۇلى نازاربايەۆقا ۇلكەن راحمەت ايتقىم كەلەدى» ، - دەيدى ديماش.
ارتىنشا «31 -ارنانىڭ» دەلەگاتسياسى «مەن ءانشىمىن» ءدۇبىرلى دوداسى ارقىلى ديماشتى كۇللى الەمگە تانىمال ەتكەن «حۋنان ت ۆ» باسشىلىعىمەن كەزدەستى. الداعى ۋاقىتتا ەكى تەلەارنانىڭ بىرلەسىپ جاساعان جاڭا حالىقارالىق جوبالارى ەفيرگە جول تارتۋى ابدەن مۇمكىن.
«ەڭ ءبىرىنشىسى، ول، ارينە، بىرگە قوسىلىپ جوبا جاساۋ. ديماشتىڭ اتىن ودان ءارى جەر جۇزىنە تاراتۋ» ، - دەيدى «31 -ارنانىڭ» باس ديرەكتورى باعدات قوجاحمەتوۆ.
«ەكى ەل اراسىنداعى مادەنيەت، دوستاستىعىمىزدىڭ ارقاسىندا ديماش تانىمال بولدى. بۇدان دا ۇلكەن جوبالاردى سىزدەردىڭ تەلەارنالارىڭىزبەن بىرلەسىپ جاساۋعا ءبىز دايىنبىز»، - دەيدى «حۋنان ت ۆ» باس باقىلاۋشىسى لي حاۋ حۋ.
ەندىگى ماسەلە - ديماش قىتايدا قالا ما، الدە مۇحيتتىڭ ار جاعىنا كەتە مە؟ «8 جىلعا كەلىسىمشارتقا وتىرماقشى ەكەن» دەگەن سىبىس قازىر ەل ىشىندە جەلدەي ەسىپ ءجۇر. دەگەنمەن، ءانشى تاڭداۋىن جاساپ قويعان سياقتى. ول جاڭالىقتى جاقىندا ەستيسىزدەر.
«جاقسى جاڭالىقتارمەن قۋانتامىن شىداڭىزدار»، - دەيدى ديماش.
تالاي دودادا توپ جارعانىمەن، شىنايى باعاسىن سىرتتا العان ديماشتىڭ قازاقستانعا ەرتەڭ قايتا قويمايتىنى انىق. نەبارى ءۇش ايدا الەمدىك ساحنانى باعىندىرعان ءانشىنىڭ كۇنتىزبەسىندە بوس كۇن جوق قازىر.
«ارينە قىتاي حالقى ماعان وسىنداي ۇلكەن كورەرمەندەر اۋديتورياسىن جيناپ بەرگەننەن كەيىن، مەن مىندەتتى تۇردە جۇمىسىمدى قىتاي ەلىندە دە جالعاستىراتىن بولامىن»، - دەيدى ديماش قۇدايبەرگەن.
ديماش قازاق ءانىنىڭ داڭقىن شەتەلدە اسقاقتاتتى. ديماش ميللياردتتاعان كورەرمەننىڭ جۇرەگىن جاۋلادى. ديماش- فەنومەن! ديماش- چەمپيون!