بۇل كونەدەن كەلە جاتقان ءداستۇردى ش ق و- نىڭ تۇرعىنى بانۋ ەسىمدى كەلىنشەك تە باسىنان وتكەرىپتى دەپ حابارلايدى وڭىردەگى NUR. KZ ءتىلشىسى.
ايتۋىنشا، كۇيەۋى جول اپاتىنان كوز جۇمعان، سوندىقتان اۋلەتتەگى ۇلكەن كىسىلەر ءۇش بالانى جەتىمسىرەتپەي تۋعان قاينىسىنا تۇرمىسقا بەرگەن.
«2010-جىلى جولداسىم كەنەتتەن قايتىس بولدى. ول كەزدە تۇڭعىشىمىز ءتورت جاستا، ەكىنشىم ءۇش جاستا بولاتىن. كەنجە بالاما اياعىم اۋىر ەدى. وتاعاسىنىڭ قىرقىن وتكەرگەننەن كەيىن، ۇيدەگى اپامىز قاينىما تۇرمىسقا شىعۋىمدى ءوتىندى. بار ويى بالالار جاتباۋىر بولىپ، جەتىمسىرەمەسىن دەدى.
مەن بۇعان باسىندا كونبەدىم. وزدەرى قاينىمدى دا ماعان ۇيلەنۋگە ۇگىتتەپ قويعان. ول دا ءومىرى ۇيلەنبەگەن. جولداسىمنان بار بولعانى ءۇش جاس كىشكەنتاي. نە كەرەك. ءبىر كۇنى ەنەم ۇيگە انامدى شاقىرتتى. ەكەۋى ءبىزدى ورتالارىنا الىپ، تۋعان انام اڭگىمە باستادى.
«قىزىم، ءتىرى ادام تىرشىلىگىن جاسايدى. ەندى كۇيەۋىڭ قايتىپ كەلمەيتىنى بەلگىلى. سەن تۇرمىسقا شىعۋىڭ كەرەك. قاينىڭمەن باس قوسقانىڭدى قالايمىن دەدى»، - دەيدى بانۋ.
وسىلايشا، ۇلكەندەردىڭ قالاۋىن جەرگە تاستاماعان ايەل قاينىسىنا تۇرمىسقا شىققان. الايدا كەزىندە مىنەزى جۋاس جىگىتتەن جۋان شىعادى دەگەن ونىڭ ءۇش ۇيىقتاسا دا تۇسىنە كىرمەپتى. «ءبىر جاستىقتى بولىسپەك تۇرماق، ءبىر بولمەگە سىيمايتىن بولدىق»، - دەيدى كەلىنشەك.
«ارادا 6 اي وتكەندە ءۇشىنشىمدى بوساندىم. ءدال سول كەزدە ەنەم قايتىس بولدى. اڭگىمە سودان باستالدى. بۇرىن ىشىمدىكتەن تاتىپ الماعان قاينىم اۋىل ازاماتتارىنا قوسىلىپ، اۋزى اراقتان قۇرعامايتىنعا اينالدى. كۇندە تويىپ كەلىپ، «تەگىن كونسەرت» قوياتىن بولدى.
جانجالدى ءوزى باستايدى. جاتساق تا، تۇرساق تا ايتاتىنى ءبىر نارسە. ماعان: «اعامدى سەن ءولتىردىڭ. تۋعان ۇلىڭ شەشەمدى جالمادى. سەنىمەن تۇرعىم كەلمەيدى»، - دەيدى. قۇزعىندارىڭدى ەرتتە كوزىڭدى قۇرت دەي بەردى»، - دەيدى تەگىن اتاماۋدى ءجون ساناعان كەيىپكەر.
ءبىراق، بانۋدىڭ اناسى مەن اعالارى العاشىندا قىزدارىنىڭ قايتىپ كەلگەنىن قالاماعان. ولار نە بولسا دا تاعدىردىڭ جازۋىنا ءتوزۋىن تالاپ ەتىپتى. سوندىقتان بارلىعى كۇيەۋ بالالارىنىڭ ءسوزىن سويلەپ كەلگەن.
«جاقىندارىمدى كورسەم، شىداماي جىلاپ جىبەرەمىن. ولار ماعان ولسەڭ وسى ۇيدەن سۇيەگىڭدى دە المايمىز دەپ ۇرساتىن. ءبىر كۇنى تاڭەرتەڭ ەرتە تۇرىپ قازىرگى كۇيەۋىممەن تىلدەسۋدى ءجون سانادىم. ءوزى قاسىما دا جاتپايتىن. بولەك قوناق بولمەسىن پانالاپ ءجۇردى. جايلاپ قاسىنا باردىم. ويىمدا جۇرگەن ءسوزدىڭ ءبىرىن اشىق ايتتىم. سوندا مەنى سۇيمەيتىندىگىڭ جانە كەشكە ءوزى كەلگەنشە ۇيدەن كەتۋىمدى سۇرادى. ال مەن بالالارىممەن قايدا بارامىن؟ تۋعاندارىم ەسىگىنەن اتتاتپايدى.
امالسىز ۇيدە قالدىم. تۇنگى ساعات 11 دە ەسىكتى قاقتى. اشسام قاسىندا ءبىر ايەل بار. «بانۋ شاي قويىپ، بىزگە توسەك سال» دەپ بۇيىردى. ءبارىن ىستەدىم. ءبىر مەزەتتە «جەتىمدەرىڭدى ال دا كوزىڭدى قۇرت. تەز كيىم-كەشەگىڭدى جينا دا شىق. ەندى ماعان جولاما دەپ» ۇيدەن شىعارىپ ەسىكتى قۇلىپتاپ الدى.
سول كۇنى كورشى-قولاڭنىڭ ۇيىنە بارۋعا ۇيالىپ، سيىر قورادا تۇنەدىك. ەرتەڭىندە ۇلكەن اعاما قوڭىراۋ شالىپ، ءبارىن ايتتىم. بىرگە تۋعانىم عوي، كەلدى دە جيناپ اكەتتى»، - دەيدى بانۋ.
قازىر بانۋ بالا-شاعاسىمەن اناسىنىڭ قولىندا تۇرىپ جاتقان كورىنەدى. كەيىپكەرىمىز دامىعان زاماندا امەڭگەرلىكتىڭ قاجەتى شامالى ەكەندىگىنە كوز جەتكىزىپتى. سوندىقتان، ءوزى سياقتى جەسىر قالعان كەلىنشەكتەرگە كونە سالتپەن تۇرمىس قۇرماۋعا كەڭەس بەرەدى.