تۇركىمەنستان پرەزيدەنتى قازاق تىلىندەگى كىتاپتارىن تانىستىردى - فوتو

استانا. قازاقپارات - بۇگىن استانادا تۇركىمەنستان پرەزيدەنتى گۋربانگۋلى بەردىمۇحامەدوۆتىڭ جىلقى مەن ات ءوسىرۋ ونەرىنە ارنالعان ءۇش بىردەي كىتابىنىڭ تانىستىرىلىمى ءوتتى.

تۇركىمەن باسشىسىنىڭ وسى ەڭبەكتەرى قازاق تىلىندە العاش رەت جارىق كورىپ وتىر.

شارا بارىسىندا بەردىمۇحامەدوۆ بىرنەشە كىتاپقا ءوز قولتاڭباسى مەن جىلى لەبىزىن جازىپ، ق ر پرەزيدەنتى نۇرسۇلتان نازاربايەۆقا بەرىپ جىبەردى، دەپ حابارلايدى قازاقپارات ءتىلشىسى. تۇركىمەن حالقى جىلقى جانۋارىن، اسىرەسە، اقالتەكە تۇلپارىن ەرەكشە قادىر تۇتادى. مەملەكەتتىڭ ەلتاڭباسىندا اقالتەكەنىڭ بەينەلەنۋى سونىڭ ءبىر ايعاعى بولسا كەرەك.

گۋربانگۋلى بەردىمۇحامەدوۆ تا وسى جىلقىنىڭ قىر-سىرىن جاقسى بىلەدى. سونىڭ ءبارىن ول «اقالتەكە تۇلپارى - ماقتانىشىمىز بەن ابىرويىمىز» اتتى ەڭبەگىندە كەڭىنەن بايانداعان.

«كوك تۇلپارلارىنىڭ سامعاۋى» اتتى فوتوالبوم- كىتابىندا تۇركىمەن ەلىندەگى جىلقى شارۋاشىلىعى، وسى سالاداعى ۇلتتىق داستۇرلەر، سونداي- اق تۇركىمەنستاننىڭ مەملەكەتتىك ساياساتىنىڭ باسىم باعىتتارى جايىندا ايتىلدى.

ال «تۇلپاردىڭ شاپشاڭ شابىسى» ەڭبەگىندە گۋربانگۋلى بەردىمۇحامەدوۆ تۇركىمەن تۇلپارىن ۇلتتىق قۇندىلىقتاردىڭ ءبىرى رەتىندە كورسەتىپ، سونى عىلىمي، تاريحي جانە ادەبي- بيوگرافيالىق تۇرعىدا دالەلدەپ شىقتى.

«بۇگىن مەن ۇلتتىق مۋزەيدى ارالاعاندا قازاق پەن تۇركىمەن حالىقتارىنىڭ تاريحي، مادەني جاعىنان جاقىن ەكەنىنە تاعى ءبىر مارتە كوز جەتكىزدىم. ۇلتتىق جادىگەرلەر، ايەلدەردىڭ اشەكەيلەرى جانە تاعى باسقا ورتاق قۇندىلىقتارىمىز بارشىلىق. جىلقى جانۋارىنا جاقىندىعىمىز دا ۇقساس.

ماسەلەن، بىزدە «تاڭەرتەڭ تۇرعاندا الدىمەن اكەڭمەن، سوسىن اتىڭمەن امانداس» دەگەن قاعيدا بار. ال تاريحقا ۇڭىلەتىن بولساق، قازاقتار مەن تۇركىمەندەر كوپتەگەن سوعىستاردا جۇيرىك اتتارىنىڭ ارقاسىندا جەڭىمپاز بولىپ شىققان. جاۋگەرشىلىك زاماندا اتتارىمىزدىڭ جۇيرىكتىگىن باسقا ۇلتتار مەن ۇلىستار دا جاقسى بىلگەن. سوندىقتان ءبىزدىڭ تاريحىمىزدا جىلقى جانۋارىنىڭ ورنى بولەك»، - دەدى بەردىمۇحامەدوۆ استاناداعى ۇلتتىق مۋزەيدە وتكەن كىتاپتاردىڭ تانىستىرىلىمىندا.

تۇركىمەن باسشىسىنىڭ ايتۋىنشا، بۇگىندە اقالتەكە تۇلپارى بويىنشا حالىقارالىق قاۋىمداستىق بار. وعان قازاقستان ازاماتتارى دا كىرەدى. ال 30 -ءساۋىر تۇركىمەنستاندا اقالتەكە تۇلپارىنا ارنالعان مەملەكەتتىك مەيرام رەتىندە اتالىپ وتەدى. گۋربانگۋلى بەردىمۇحامەدوۆ بارشا قازاقستاندىقتاردى وسى مەرەكەگە قاتىسۋعا شاقىردى. ايتا كەتەر ءجايت، تۇركىمەنستان پرەزيدەتىنىڭ كىتاپتارى ق ر ۇلتتىق وليمپيادا كوميتەتىنىڭ باسشىسى تيمۋر قۇلىبايەۆتىڭ باستاماسىمەن قازاق تىلىنە اۋدارىلىپ وتىر.

بۇعان دەيىن اتالعان كىتاپتار ورىس تىلىندە جارىق كورگەن. قازاق تىلىندەگى نۇسقالارىنىڭ ءارقاسىسى مىڭ دانامەن باسىلدى. ولاردىڭ بارلىعى ەلىمىزدەگى كىتاپحانالار مەن وقۋ ورىندارىنا تاراتىلاتىن بولادى.

اۆتور: ارمان اسقاروۆ