«17- ساۋىردە ساعات 11-دەن باستاپ 1200 تەكشە مەترگە دەيىن سۋ كەلدى. بۇل وتە جوعارى دەڭگەي. كەيىن اعىس قارقىنى 1044 تەكشە مەترگە ءتۇستى. قازىر استانا سۋ قويماسىنا كەلىپ جاتقان سۋدىڭ كولەمى سەكۋندىنا 150-200 تەكشە مەتردى قۇراپ وتىر. وسى ورايدا ونىڭ بارلىعىن سۋ قويماسىندا ساقتاپ قالۋ مۇمكىندىگىمىز بار. استانا سۋ قويماسىنىڭ سىيىمدىلىعى 410 ميلليون تەكشە مەتر بولسا، وندا قازىر 385 ميلليون تەكشە مەتر سۋ تولتىرىلعان، ياعني تاعى 25 ميلليون تەكشە مەتر جيناي الامىز»، - دەدى ي. ءابىش باسپا ءسوز ءماسليحاتى بارىسىندا.
بۇدان بولەك كوميتەت ءتوراعاسى ءتيىستى سۋ دەڭگەيى استانا سۋ قويماسىندا ساقتالعانىن، ال ارتىق كولەمدەگى اعىن سۋ رەتتەگىشكە جىبەرىلگەنىن اتاپ ءوتتى. ەلوردانى تاسقىن سۋدان قورعايتىن بۇل رەتتەگىشتىڭ سىيىمدىلىعى 450 ميلليون تەكشە مەتردى قۇرايدى. بۇگىندە وعان 250 ميلليون تەكشە مەتر قۇيىلعان كورىنەدى. ساعات 18:00-دەگى جاعداي بويىنشا استانا سۋ قويماسىنان رەتتەگىشكە ءتۇسىپ جاتقان اعىس تولىق جابىلدى.
«سۋ رەتتەگىشكە جينالاتىن 250 ميلليون تەكشە مەتر سۋدى «ەسىل» وزەنى ارقىلى جىبەرەمىز. ياعني ءبىر ايدا 100 ميلليون تەكشە مەتر سۋدى وزەنگە باعىتتايمىز. شامامەن 150 ميلليون تەكشە مەترى سۋ رەتتەگىشتە قالادى. وسى كولەمدى مامىر، ماۋسىم ايلارىندا جىبەرىپ وتىرامىز. سوندىقتان بۇگىندە قالانى «ەسىل» وزەنى ارقىلى نەمەسە استانا سۋ قويماسى تاراپىنان تاسقىن سۋ باسىپ قالاتىنداي ەشقانداي قاۋىپ جوق. ونى تولىق سەنىممەن ايتا الامىز»، - دەپ تۇيىندەدى ءسوزىن ي. ءابىش.
اۆتور: رۋسلان عابباسوۆ