كوپ ۋاقىت بويى ورماندا مايمىلدارمەن بىرگە تۇرعان كىشكەنتاي قىز ادام ءتىلىن ۇمىتىپ، ءتورت اياقتاپ جۇرەدى. بالانىڭ اتا-اناسىنىڭ ايتۋىنشا، قىزدارى ءبىر جىل بۇرىن بازار ماڭىندا ولاردان قاشىپ كەتكەن، دەپ جازادى Daily Mail.
45 جاستاعى رامزان الي شاح پەن ونىڭ 35 جاستاعى جۇبايى نازما قىزدارىنىڭ سۋرەتىن گازەت بەتىنەن كورگەنىن ايتادى.
«ءبىز ءوز كوزىمىزگە ءوزىمىز سەنبەدىك. قىزىمىز بازارداعى ىعى-جىعى كىسىلەردىڭ اراسىندا ءجۇرىپ، بىزدەن قاشىپ كەتكەن ەدى. سودان بەرى ول ۇشتى-كۇيلى جوق بولىپ كەتتى»، - دەيدى قىزدىڭ اكەسى.
شاح قىزىنىڭ ەسىمى اليزا ەكەنىن جانە ونىڭ 10 جاستا ەكەنىن العا تارتىپ وتىر. ونىڭ ايتۋىنشا، قىز پسيحيكالىق دەرتكە شالدىققان جانە ءدارى ساتىپ الىپ تۇرعان كەزدە ولاردان قاشىپ كەتكەن.
سونداي-اق شاح جەرگىلىكتى پوليتسيانىڭ قىزىن تاۋىپ بەرۋگە ەش قۇلىق تانىتپاعانىن ايتادى. ەندى شاح پەن ونىڭ جۇبايى ورماندا تابىلعان قىزدىڭ اتا-اناسى ەكەنىن دالەلدەۋ ءۇشىن قان تاپسىرۋلارى قاجەت.