جانجالدى كىم ارانداتسا دا ول «وسى قىلىعى ءۇشىن تاريح الدىندا جاۋاپ بەرەدى جانە ءتيىستى قۇنىن تولەۋگە ءماجبۇر بولادى» دەپ مالىمدەگەن قىتاي ءمينيسترى بەيجىڭدە فرانسيا سىرتقى ىستەر ءمينيسترى جان-مارك ەيرومەن بىرگە وتكىزگەن باسپا ءسوز ءماسليحاتىندا.
ۆان ي قىتاي سولتۇستىك كورەيانىڭ يادرولىق جانە زىمىران باعدارلامالارى بويىنشا پحەنيان مەن ۆاشينگتوننىڭ اراسىندا ديالوگ ورناتۋعا جاردەمدەسۋگە ءازىر ەكەنىن ايتقان.
ءساۋىردىڭ 14 ءى كۇنى سولتۇستىك كورەيا ا ق ش- پەن اسكەري قاقتىعىسقا بارۋعا دايىن ەكەنىن بىلدىرگەن. سولتۇستىك كورەيا سىرتقى ىستەر ءمينيسترىنىڭ ورىنباسارى حان سون رەل Associated Press اگەنتتىگىنە سۇحباتىندا پحەنياننىڭ الدىن الا سوققى بەرۋگە يادرولىق قاۋقارى جەتكىلىكتى دەپ مالىمدەگەن بولاتىن.
بۇعان دەيىن جۇما كۇنى ۆاشينگتون سولتۇستىك كورەيا باستى مەيرام كۇنى - ءساۋىردىڭ 15 ىندە مەملەكەت نەگىزىن قالاۋشى كيم ير سەننىڭ تۋعانىنا 105 جىل تولۋىنا ارناپ كەزەكتى يادرولىق قارۋ سىناعىن وتكىزۋگە تالپىناتىن بولسا، ول سىناققا جول بەرمەۋ ماقساتىندا بۇل ەلگە قارسى اسكەري سوققى بەرۋ مۇمكىندىگىن قاراستىرىپ جاتقانى تۋرالى اقپارات تاراعان.
جەكسەنبى، ءساۋىردىڭ 16 سى كۇنى ا ق ش ۆيتسە-پرەزيدەنتى مايك پەنس كورەي تۇبەگىندەگى احۋالدى تالقىلاۋ ءۇشىن وڭتۇستىك كورەياعا ساپارمەن بارماقشى.
بۇعان دەيىن جاڭادان يادرولىق سىناق وتكىزەتىنىن جاريالاعان سولتۇستىك كورەيا بيلىگىنە جاۋاپ رەتىندە ا ق ش ۇلكەن ۇشاق تاسىعىشى باستاعان اسكەري كەمەلەرىن كورەي تۇبەگىنە جىبەرگەننەن كەيىن ۆاشينگتون مەن پحەنيان اراسىنداعى جاعداي كۇرت شيەلەنىسىپ كەتكەن ەدى.