ەل تاريحىنداعى ەڭ ءىرى اسكەري پارادقا وتاندىق تەحنيكالار قاتىسادى
بۇل تۋرالى بۇگىن ورتالىق كوممۋنيكاتسيالار قىزمەتىندە قازاقستان رەسپۋبليكاسى قارۋلى كۇشتەرىنىڭ 25 جىلدىعىنا ارنالعان باسپا ءسوز ءماسليحاتىندا ق ر قورعانىس ءمينيسترىنىڭ ورىنباسارى، گەنەرال-مايور تالعات جانجۇمەنوۆ ءمالىم ەتتى.
«بۇل اسكەري پاراد جەكە قۇرام جانە تەحنيكالار سانى بويىنشا ەل تاريحىنداعى ەڭ ءىرى شەرۋ بولماق. ونىڭ ەرەكشەلىگى اۋماقتىق قورعانىس بريگاداسى روتاسىنىڭ، بارلاۋ روتاسىنىڭ جانە ەلىمىزدەگى ءتورت «جاس ۇلان» مەكتەبىنىڭ قۇراما بارابانشىلار روتاسىنىڭ جانە قر قورعانىس مينيسترلىگى اسكەري- تەحنيكالىق مەكتەبىنىڭ تارتىلۋى»، - دەپ اتاپ ءوتتى تالعات جەڭىس ۇلى.
ايتۋلى كۇنى استانانىڭ تاۋەلسىزدىك الاڭىنا بەس مىڭنان استام اسكەري قىزمەتشى سالتاناتتى مارشپەن ءجۇرىپ وتەدى. ق ر قورعانىس ءمينيسترى ورىنباسارىنىڭ حابارلاۋىنشا، ولار قاتاڭ ىرىكتەۋدەن وتكەن جانە 10 -اقپان كۇنى تۇراقتى ورنالاسۋ پۋنكتتەرىندە جاتتىقتىرۋ جۇمىستارى باستالعان. پارادتا 300 گە جۋىق اسكەري تەحنيكا جۇرتشىلىق نازارىنا ۇسىنىلادى.
الاڭدا العاش رەت باسقارىلاتىن ۇشۋ اپپاراتتارى («Wing Long»، «Hermes-90» جانە «بۋسەل»)، گيدروسيكل، كاتەر، كۆادروسيكل، باگگي جانە «دجيگيت» زەڭبىرەك قوندىرعىلارى قويىلادى.
اۋە قورعانىسىنىڭ 80 دانا اۆياتسيالىق تەحنيكاسى، «حيۋي» تىكۇشاعى جانە TL-2000, Zlin وقۋ- جاتتىقتىرۋ ۇشاقتارى قازاقستاندىق اۆياتسيانىڭ كوك اسپانداعى قۋاتى مەن جاۋىنگەرلىك ازىرلىگىن پاش ەتەدى. بۇل شەرۋدە قازاقستاندىقتار 2016-2017 -جىلدارى اسكەري ارسەنالىمىزدى تولىقتىرعان سۋ جاڭا تەحنيكالاردى تاماشالاي الادى.
اسكەري پاراد قولباسشىسى رەتىندە ق ر قارۋلى كۇشتەرى قۇرلىق اسكەرىنىڭ باس قولباسشىسى، گەنەرال مايور مۇرات بەكتانوۆ تاعايىندالعان. پارادتى ەلباسى، قارۋلى كۇشتەردىڭ جوعارعى باس قولباسشىسى قابىلدايدى. باسپا ءسوز ءماسليحاتىندا ت. جانجۇمەنوۆ پارادقا شىعارىلاتىن اسكەري تەحنيكالاردىڭ جارتىسىنا جۋىعى وتاندىق ءونىم ەكەنىن مالىمدەدى.
«ماسەلەن، «ارلان» بروندى تەحنيكاسى «قازاقستان ينجينيرينگ» ا ق زاۋىتىندا شىعارىلعان. قازگراد رەاكتيۆتى تەحنيكاسى پەتروپاۆل قالاسىندا اۋىر ماشينا جاساۋ زاۋىتىندا جاسالعان. نەگىزگى كولىك بولىپ سانالاتىن كامازداردىڭ بارلىعىن كوكشەتاۋلىق «كاماز ينجينيرينگ» ا ق جاساپ شىعارعان. «دجيگيت» زەڭبىرەك قوندىرعىلارى دا ءوزىمىزدىڭ ءونىم.
ياعني، اسكەري پارادقا شىعارىلاتىن تەحنيكالاردىڭ تەڭ جارتىسى وتاندىق قورعانىس ونەركاسىپتەرىندە شىعارىلعان»، - دەدى گەنەرال- مايور.
سونىمەن بىرگە، قورعانىس ءمينيسترىنىڭ ورىنباسارى ەل اۋماعىندا قارۋلى كۇشتەرىنىڭ 25 جىلدىعىنا ارنالعان شارالاردىڭ جىل بويى جالعاساتىنىن حابارلادى. ونىڭ ايتۋىنشا، 25 جىلدىققا وراي، بيىل جاڭا اسكەري زاماناۋي تەحنيكالار الىنىپ، اسكەري قىزمەتشىلەرگە باسپانا كىلتى تابىستالادى، جاس ورەندەردى پاتريوتتىق تاربيەلەۋگە باعىتتالعان ءتۇرلى سپورتتىق-مادەني شارالار ۇيىمداستىرىلادى.
اۆتور: ايجان سەرىكجان قىزى