نۇرلان نىعماتۋلين: ەلباسى ۇسىنعان رۋحاني جاڭعىرۋ - مەملەكەتتىڭ تىرەگى، حالىقتىڭ جىگەرى
وسىنداي پىكىردى ق ر پارلامەنتى ءماجىلىسىنىڭ ءتوراعاسى نۇرلان نىعماتۋلين «ەگەمەن قازاقستان» گازەتىندە جاريالانعان ماقالاسىندا ءبىلدىردى.
«ەلباسىنىڭ «بولاشاققا باعدار: رۋحاني جاڭعىرۋ» ماقالاسى - وسى جەتىستىكتەرىمىزدى ودان ءارى ەسەلەي ءتۇسۋدىڭ، العا قويعان ۇلى ماقساتتارعا جەتۋدىڭ بەرىك تۇعىرىن ورناتۋدىڭ جارقىن كورسەتكىشى.
ۇلى مەملەكەت ءارقاشاندا ۇندەستىك زاڭىمەن ءومىر سۇرەدى. وسى جولدا رۋحاني سەرپىلىس ءاربىر ادامنىڭ، ءبۇتىن قوعامنىڭ تىنىسىن وزگەرتەتىن ەرەكشە قۇبىلىس. سوندىقتان دا، ەلباسى حالقىمىزدىڭ تاعىلىمى مول تاريحى مەن ۇلتتىق سالت-داستۇرلەرىن ەلدە جۇرگىزىلىپ جاتقان ساياسي رەفورما مەن ەكونوميكالىق جاڭعىرۋدىڭ وزەگىنە اينالدىرا وتىرىپ، قازاقستان قوعامى مەن ءاربىر قازاقستاندىقتىڭ ساناسىن جاڭعىرتۋدىڭ التى نەگىزگى باعىتىن بەلگىلەپ بەردى.
ولاردىڭ بارلىعى تەڭدەسى جوق تاريحي مازمۇنعا يە بولا وتىرىپ، الداعى دامۋىمىزدىڭ باستى قاعيدالارىن انىقتادى.
وندا قازىرگى تاڭدا اسا وزەكتى بولىپ تابىلاتىن، ءارقايسىسى قىرۋار جۇمىس كولەمىن قاجەت ەتەتىن قوعامدىق-ساياسي جانە مادەني-اعارتۋشىلىق جوبالار تۇرىندە ءبىرقاتار ناقتى شارالار قامتىلعان. بۇل حالقىمىزدىڭ الدىندا جاڭا كوكجيەكتەر كەڭىستىگىن اشىپ، ەلىمىزدى ساپالىق جاعىنان جاڭا دامۋ دەڭگەيىنە شىعاراتىنى ءسوزسىز.
ءبىز تەحنولوگيا مەن يننوۆاتسياعا، جاڭا ەكونوميكا سالالارىن دامىتۋ مەن زاماناۋي ينفراقۇرىلىم قۇرۋعا باسا ءمان بەرە وتىرىپ، كەز كەلگەن حالىقتىڭ دامۋىندا باعا جەتپەس ءرول اتقاراتىن رۋحاني نەگىزدەردى دە ەستەن شىعارماۋعا ءتيىسپىز. جوعارى ءبىلىمدى ءارى رۋحاني جاعىنان باي ادامدار عانا ۋاقىتتىڭ جاڭا سىن-قاتەرلەرىنە جەدەل دەن قويىپ، شۇعىل شارالار قابىلداۋعا، باتىل قادامدار جاساۋعا قابىلەتتى بولماق. سوندىقتان، ەلباسىمىزدىڭ رۋحاني جاڭعىرۋ باعدارلاماسى قوعام دامۋىنا تىڭ سەرپىن بەرىپ، ءاربىر ازاماتتى العا جەتەلەيتىن تاريحي كۇشكە اينالارى ءسوزسىز»، - دەلىنگەن ماقالادا.