قازاق زيالىلارىنىڭ ماحاببات جايلى ايتقان وي تولعاۋلارى
سەبەبى، ماحاببات - ءومىردىڭ ولەڭ جىرى، جارىق كۇنى. ماحاباتتا - ادام بالاسىنىڭ جان دۇنيەسىندەگى ەڭ ۇلى سەزىم. بۇل تاقىرىپتا قازاق زيالىلارى دا قالام تەربەگەن.
نازارلارىڭىزعا سولاردىڭ ءبىر توپتاماسىن ۇسىنامىز.
****
ماحاببات - اۋەلى ادامنىڭ ادامدىعى، عىلىم دەگەن نارسەلەرمەن بايلانىستى.
اباي قۇنانبايەۆ
****
ادامشىلىقتىڭ الدى - ماحاببات، عادەلەت سەزىم.
اباي قۇنانبايەۆ
****
ار-نامىس، ماحاببات بولماعان جەردە ادامشىلىق تۇرا ما؟! بۇل سيپاتتاردىڭ بولۋى ءۇشىن ادام بالاسى ازات، تاربيەلى بولۋعا ءتيىس.
ءمىرجاقىپ دۋلاتوۆ
****
جاڭا عاشىق بولعان شاعىڭدا وي دا جاڭعىرعان تارىزدەنەدى.
مۇحتار اۋەزوۆ
****
سۇيگەن شاقتا ءبىزدىڭ اقىلسىزدانىپ، اقىماق بولىپ كەتەتىنىمىز دە بولادى.
مۇحتار اۋەزوۆ
****
شىن ماحاببات، شىنايى ماحاببات وتىرىكپەن استە سيىسپايدى. ونداي ماحاببات قورلىققا دا، زورلىققا دا «ريزا بولىپ شىدايدى». سۇيگەن جۇرەك، ادال جۇرەك ەسەپتەسۋدى بىلمەيدى.
ءسابيت مۇقانوۆ
****
ماحاببات، دوستىق، باۋىرمالدىق - ادامنىڭ ەڭ ءبىر اسىل قاسيەتتەرى.
عابيت مۇسىرەپوۆ
****
بالاعا سىڭىرگەن اتا-انا ەڭبەگىن بالا ءومىر بويى اقتاپ بولا المايدى. بالاعا دەگەن ماحابباتقا ەشبىر ماحاببات تەڭدەسە المايدى، ول ولە-ولگەنشە سۋىنبايتىن ماحاببات.
عابيدەن مۇستافين
****
جۇرەكتى شىن كۇيدىرسە، ماحاببات ازابىنىڭ ءوزى دە ءبىر قۋانىش ەمەس پە؟ ءيا، زور قۋانىش. ويتكەنى جۇرەك كۇيۋ ءۇشىن شىن ماحاببات، زور ماحاببات كەرەك. ال، ونداي ماحاببات جانىڭا قانشا ازاپ سالسا دا - قۋانىش، باقىت.
ءىلياس ەسەنبەرلين
****
ماحابباتتا تۇراقسىز بولۋ - ۇلكەن كۇنا.
ءىلياس ەسەنبەرلين
****
ەكى ادامنىڭ ءبىر-بىرىنە شىن ىقىلاس پەن قالتقىسىز قىزمەت ەتۋى، نە ارالارىنداعى ادال ماحابباتتىڭ، نە اسىل دوستىقتىڭ ارقاسى.
ءازىلحان نۇرشايىقوۆ
****
ماحاببات - زور سانالىلىقتىڭ، بىلگىر-بىلىمدىلىكتىڭ، اسقان اقىل-ويدىڭ جەمىسى ەمەس، ول - تەك جەردە عانا ءومىر سۇرەتىن، بىرتە-بىرتە ارحايزمگە اينالاتىن، تۋۋى بار، ءوسىپ-ءونۋى جوق كوزگە كورىنبەي ماڭگى جاسايتىن بەينەسى بەلگىسىز دارا ۇعىم.
ورالحان بوكەي
Massaget.kz