بۇل تۋرالى Sputnik قازاقستان حابارلايدى.
2016 -جىلدىڭ كۇزىنەن بەرى قازاقستاندىق نارىقتا SAUMAL® ساۋدا ماركاسىمەن قۇرعاق بيە ءسۇتى پايدا بولدى. بۇل ءونىم -% 100 تابيعي، قۇرعاتىلعان، ءبىراق پايدالى قاسيەتتەرىن ساقتاپ قالعان بيە ءسۇتى. «ەۆرازياينۆەست ltd» كومانياسى ديرەكتورىنىڭ ورىنباسارى عالىمجان مەيرامبەكوۆتىڭ ايتۋىنشا، نەمىستىڭ سۋبليماتسيا تەحنولوگياسىمەن قۇرعاتىلعان بيە ءسۇتىنىڭ تابيعي ساۋمالدان كوپ ايىرماشىلىعى جوق.
«ءبىزدىڭ قۇرعاق ءسۇت تابيعي بيە سۇتىمەن توقسان بەس پايىزعا ۇقساس. جاڭا ساۋىلعان ءسۇت سياقتى. بۇعان سۋبليماتسيا تەحنولوگياسىنىڭ ارقاسىندا قول جەتكىزەمىز. سۋبليماتسيا - بۇل تومەن تەمپەراتۋرادا ءونىمدى قۇرعاتۋ تەحنولوگياسى»، - دەپ اڭگىمەلەدى ول ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
ونىڭ سوزىنشە، تابيعي ونىمگە بۇگىنگى كۇنى شەتەلدىكتەر تاراپىنان قىزىعۋشىلىق بار ەكەن. كاسىپورىن ءونىمىن رەسەي، قىتاي، وڭتۇستىك كورەيا، جاپونيا جانە ەۋروپانىڭ كەيبىر ەلدەرىنە ەكسپورتقا شىعارۋدى كوزدەپ وتىر.
«ەۋروپادا قۇرعاق بيە ءسۇتىن وندىرەتىن جانە ونىڭ نەگىزىندە ءونىم شىعاراتىن وتىز مىڭعا جۋىق شارۋاشىلىق بار. بۇگىنگى كۇنى رەسەي، قىتاي، وڭتۇستىك كورەيا، جاپونيا، ەۋروپا ەلدەرىنىڭ ءبىرقاتار كومپانيالارى قىزىعۋشىلىق تانىتىپ وتىر. ولار ءبىزدىڭ ءونىمنىڭ ۇلگىسىن الىپ كوردى. ەندى ءبىزدىڭ ءسۇتتى ساتىپ الۋعا دايىن. تەك رۇقسات ەتۋ قۇجاتتارى بويىنشا ماسەلە بار. وكىنىشكە قاراي، قازاقستان بۇل ەلدەرگە ءسۇت ءونىمىن جەتكىزگەن ەمەس. سوندىقتان اككرەديتاتسيانى تولىقتاي وتۋگە وتۋگە تۋرا كەلەدى. اۋىل شارۋاشىلىعى مينيسترلىگىنىڭ كومەگىمەن بيىل جازدىڭ سوڭىنا دەيىن ەكسپورتقا ءبىرىنشى پارتيانى جونەلتەمىز دەپ جوسپارلاپ وتىرمىز»، - دەدى مەيرامبەكوۆ.
كاسىپورىن 15 تونناعا دەيىن ءونىم وندىرەدى، ونىڭ جارتىسى قازاقستاندا ساتىلادى. ءبىراق، قۇرعاق بيە ءسۇتىنىڭ باعاسى قالتادان اجەپتاۋىر قاعاتىنىن ايتۋ كەرەك.
« ءبىر قۇتىنىڭ كولەمى 500 گرامم، باعاسى 30 مىڭ تەڭگە. ءبىر قۇتى 20-30 كۇنگە جەتەدى. بۇل اسا قىمبات ەمەس. ەۋروپادا بۇدان دا قىمبات. ءبىزدىڭ ءونىمدى ساتىپ الۋشىلاردىڭ الپىس پايىزى - ايەلدەر. ويتكەنى دارىگەرلەر ايەلدەرگە بالالارىنا بيە ءسۇتىن بەرۋگە كەڭەس بەرەدى»، - دەدى مەيرامبەكوۆ.
مامانداردىڭ سوزىنشە، قۇرعاق بيە ءسۇتىنىڭ قۇرامىنا امين قىشقىلدارى، مايلار، فەرمەنتتەر، ميكروەلەمەنتتەر جانە دارۋمەندەر سەكىلدى ادام اعزاسىنا قاجەت 40 تاي بيولوگيالىق كومپونەنت كىرەدى.