تارازدا رەسپۋبليكالىق اقىندار ايتىسى ءوتتى
07:18, 11 - ءساۋىر 2017
استانا. قازاقپارات - تاراز قالاسىنداعى «بالاساعۇن» ورتالىق كونسەرت زالىندا «ەكسپو-2017» حالىقارالىق كورمەسى اياسىندا «تۋعان جەر - تال بەسىگىم!» اتتى رەسپۋبليكالىق اقىندار ايتىسى ءوتتى.
بۇل تۋرالى وبلىس اكىمىنىڭ باسپا ءسوز قىزمەتى حابارلادى. ءسوز دوداسىنا شىعىس قازاقستان، وڭتۇستىك قازاقستان، قاراعاندى، قىزىلوردا، قوستاناي، جامبىل وبلىستارى مەن استانا قالاسىنان 20 اقىن قاتىسىپ، شاشاسىنا شاڭ جۇقپاعان اقىندار ۇلتتىق ونەردى ۇلىقتادى.
ءبىر كۇن بويى «بالاساعۇن» سارايىندا كورەرمەن مەن تىڭدارمانىن ەرەكشە دۋمانعا بولەگەن ايتىستىڭ باس جۇلدەسىن جامبىلدىق جاس اقىن دارحان ءابدىماناپ يەلەندى. جۇلدەلى ءبىرىنشى ورىن قىزىلوردالىق مۇحتار نيازوۆ پەن جامبىل وبلىسىنىڭ ءدۇلدىلى نۇرلىبەك قۇرمانوۆقا بۇيىردى.
ال، ەكىنشى ورىنعا شىعىس قازاقستان وبلىسىنىڭ اقىنى رۇستەم قايىرتاي ۇلى مەن جامبىلدىق اقىن التىنكۇل قاسىمبەكوۆا لايىق دەپ تانىلدى.
ءۇشىنشى ورىندى ەلىمىزگە بەلگىلى ازۋلى اقىندار ايبەك قاليەۆ پەن نۇرمات مانسۋروۆ ءوزارا ءبولىستى.