قازاقستاندا اقىلى جولداردا ءجۇرۋ قۇنى قاشان وسەتىنى ايتىلدى

استانا. قازاقپارات - ق ر ينۆەستيتسيالار جانە دامۋ ءمينيسترى جەڭىس قاسىمبەك اقىلى جولداردا ءجۇرۋ قۇنىن ءوسىرۋ ماسەلەسى قاشان تالقىلاناتىنىن ايتتى، دەپ حابارلايدى قازاقپارات.

«بىرنەشە جىلدان بەرى استانا مەن بۋراباي ارالىعىنداعى جولدا اقىلى جۇيە قىزمەت ەتىپ كەلەدى. ءوزىڭىز اتاپ وتكەندەي، وسى جولمەن ءجۇرۋ قۇنى دا وزگەرىسكە ۇشىراعان جوق. دەگەنمەن دە بولاشاقتا اقىلى جولدىڭ قۇنىن كوتەرۋ جوسپارلارىڭىزدا بار ما؟» - دەپ سۇرادى جەكسەنباي دۇيسەبايەۆ ماجىلىستەگى ۇكىمەت ساعاتى بارىسىندا.

ءوز كەزەگىندە ينۆەستيتسيالار جانە دامۋ ءمينيسترى جەڭىس قاسىمبەك 4-5 جىلدان بەرى «استانا-بۋراباي» جولىندا ءجۇرۋ قۇنى وزگەرمەگەنىن ايتا كەلە، ونىڭ جەڭىل كولىكتەرگە شاقىرىمىنا 1 تەڭگە، ال جۇك كولىكتەرىنە 6-8 تەڭگەگە دەيىن جەتەتىنىن اتاپ ءوتتى.

«الداعى 1-2 جىلدا باعانى كوتەرۋ جوسپارىمىزدا جوق. ءبىراق بولاشاقتا جولدا ءجۇرۋ اقىسىن كوتەرۋ كەرەك دەپ سانايمىز. سەبەبى، قۇرىلىس ماتەريالدارىنىڭ باعاسى ءوسىپ جاتقانى بەلگىلى. سونىمەن قاتار جولدى كۇتىپ ۇستاۋ جانار-جاعارماي كوپ كولەمدە قاجەتتىلىك ەتەدى. وسى ورايدا وتىن باعاسى ءوسىپ جاتىر. سوندىقتان قازىر ەمەس، الايدا 2-3 جىلدان كەيىن وسى ماسەلەنى قايتا تالقىلاۋعا سالامىز دەپ ويلايمىز»، - دەدى مينيستر.

اۆتور: رۋسلان عابباسوۆ