الماتىلىق ايەل ءتورت اي بويى ءانشى مايعازيەۆتىڭ ءىزىن اڭدىعان - فوتو
ءانشىنىڭ تىڭدارمانى ۇلىنىڭ تۇساۋىن تۋرا ساحىنا سىرتىندا مايعازيەۆكە كەستىرىپ الدى، - دەپ جازدى كەش قوناعى بولىپ بارعان Stan.kz ءتىلشىسى.
ءبىر جاس ءتورت ايلىق كىشكەنتاي قاناتتىڭ اناسى ۇلىنا اياعى اۋىر كەزىنەن -اق ءانشى ساكەن مايعازيەۆكە تۇساۋىن كەستىرۋدى ارمانداپ جۇرگەن. ءبىراق، انشىگە حابارلاسىپ، رۇقساتىن الۋ وڭاي بولمادى دەيدى انا. ءتورت ايدان بەرى ينستاگرامم پاراقشاسىنا جازىپ، ساكەن قاتىسقان بارلىق كونسەرتتەرگە ۇزبەي بارىپ ءجۇرىپتى. جاس انانىڭ ارمانى وسى جولى ورىندالدى.
«ساكەن اعامىزدى ۇستاۋ وتە قيىن بولدى. ءبىز وسىنداي ساحنا سىرتىنا بارۋدى، انشىلەردىڭ وسى جەردە حالىقپەن تىلدەسەتىنىن بىلمەدىك. ايتپەسە، ۇلىم ءبىر جاسىندا ءجۇرىپ كەتتى عوي. مىنە، بۇگىن ءساتى ءتۇستى. وتە قۋانىشتىمىن. ءبىزدىڭ تىلەگىمىزدى ەكى ەتپەي كەلىسكەنىنە وتە ريزامىن. ءدال وسى ساكەن اعامىزداي ءانشى بولسا ارمانىم جوق»، - دەيدى جاس انا ايگەرىم بولاتجان.
ساحنا سىرتىندا اپپاق كىلەم توسەلىپ، شاشۋ شالىعان ازىن-اۋلاق تويعا باسقا انشىلەر دە، كەلگەن جۋرناليستەر دە كۋا بولدى. ىرىم بولسىن دەپ ساكەن مايعازيەۆ قولىنداعى الا ءجىپتى بىرنەشە بولىككە ءبولىپ، سول جەردەگىلەرگە تاراتىپ بەردى.
«بۇنداي وقيعا ءجيى بولادى. قاي جەرگە، قاي قالاعا بارسام دا ۇل- قىزىن جەتەكتەگەن انالار، اجەلەرىمىز كەلىپ تۇساۋىن كەستىرتىپ جاتادى. مەنىڭ جولىمدى بەرسىن دەپ ارنايى ىزدەپ كەلەتىن حالقىما وتە ريزامىن. مەن ەكى كۇننىڭ بىرىندە كىشكەنتاي ءبىر ءسابيدىڭ تۇساۋىن كەسىپ، قادام جاساتامىن. شىن نيەتىممەن قادامدارىنا نۇر جاۋسىن دەيمىن»، - دەيدى ءانشى ساكەن مايعازيەۆ.