فۋتبولدان ق ر كۋبوگى: ىرىكتەۋ كەزەڭىنىڭ جەڭىمپازدارى انىقتالدى
ەندى بۇگىنگى جەرەبە تارتۋ راسىمىنەن كەيىن بۇل كوماندالاردىڭ پرەمەر- ليگاداعى قارسىلاستارى بەلگىلى بولادى. ناۋرىزدىڭ 28 ى مەن ءساۋىردىڭ 6 سى ارالىعىندا شىمكەنتتە قازاقستان كۋبوگىنىڭ ىرىكتەۋ دوداسى ءوتتى.
ەستەرىڭىزگە سالا كەتەيىك، ەل كۋبوگىنىڭ ەرەجەسى بويىنشا ىرىكتەۋ كەزەڭىنە ءبىرىنشى ليگانىڭ جەتى كومانداسى جانە ەكىنشى ليگانىڭ ەكى كومانداسى قاتىسىپ، ولار ءوزارا ءۇش توپقا بولىنگەن. ءار توپتىڭ جەڭىمپازى جانە ەكىنشى ورىن يەمدەنگەندەردىڭ ىشىندە كورسەتكىشى جوعارى ءبىر كوماندا 1/8-فينالعا جولداما الۋعا مۇمكىندىك العان.
تاعى ءبىر ايتا كەتەرلىگى، پرەمەر- ليگاداعى كلۋبتاردىڭ فارم- كوماندالارى دەگەن جەلەۋمەن ءبىرىنشى ليگانىڭ ءۇش كومانداسى «شاحتەر- بولات»، «بايقوڭىر» جانە «قايرات- ا» كوماندالارىنا كاسىپقوي فۋتبول ليگاسى ەل كۋبوگىنا قاتىسۋعا شەكتەۋ قويدى.
ال تۋرنير باستالعان كۇننىڭ ەرتەسىندە شىمكەنتكە شىعىستىڭ «التايىنىڭ» دا بارماعانى بەلگىلى بولدى. سەمەيدىڭ كومانداسى قازاقستان كۋبوگىنا قاتىسۋدان باس تارتقان. ءسويتىپ، ەكىنشى توپتا ەكى- اق كوماندا «قىران» مەن «ەكىباستۇز» عانا قالدى.
ءبىرىنشى توپتا «ماقتاارال» ءبىرىنشى ورىن الدى. الدىمەن شىمكەنتتىڭ №7 بجسمور كومانداسىنان 0:2 ەسەبىمەن ۇتىلىپ جاتىپ، 4:2 ناتيجەسىمەن جەڭىستى جۇلىپ العان جەتىسايلىقتار كەلەسى كەزدەسۋدە « قىزىل- جارمەن» ءبىر- ءبىر گولدان الماسىپ، تەڭ ءتۇستى. ءوز كەزەگىندە ۆلاديمير فوميچيەۆ باستاعان پەتروپاۆلدىقتار دا سپورت مەكتەبىنىڭ كومانداسىن 2:1 ەسەبىمەن ۇتىپ، ەكى ويىندا ەنشىلەرىنە 4 ۇپاي جازعان.
سوندىقتان، ەكىنشى ورىن العانداردىڭ ىشىندە ناتيجەسى ەڭ جوعارى بولعانى ءۇشىن 1/8-فينالدىڭ جولداماسىن جەڭىپ الدى. ەكىنشى توپتا ءبىر- اق كەزدەسۋ ءوتتى.
«التاي» قازاقستان كۋبوگىنا قاتىسپاعاننان كەيىن بۇل توپتىڭ جولداماسىن «قىران» مەن «ەكىباستۇز» ەكەۋارا شەشتى. ول كەزدە «التايدىڭ» ءالى احۋالى بەلگىلى بولماعان كەز. سوندىقتان شىعار، «ەكىباستۇز» 0:2 ەسەبىمەن ۇتىلىپ قالدى.
«قىران» ءبىر عانا كەزدەسۋ وتكىزىپ، كەلەسى كەزەڭنىڭ جولداماسىنا قول جەتكىزدى. ءۇشىنشى توپتا «جەتىسۋعا» تەڭ كەلەر ەشكىم بولمادى. راس، ويىندارى وڭايعا سوققان جوق. شابۋىل شەبىنىڭ اقساپ تۇرعانىن اڭعاردىق. ەكى ماتچتا دا جىلدام گول سوققانىمەن «كاسپيدىڭ» قاقپاسىنا ءبىر عانا گول توعىتا الدى.
كەشە «رۋزايەۆكامەن» وينادى. توعىزىنشى مينۋتتا-اق ەسەپ اشقانىمەن ءبىرىنشى تايمنىڭ سوڭىنا تامان سولتۇستىك قازاقستاندىقتار تارازى باسىن تەڭەستىرىپ كەتتى. تەك كەزدەسۋدىڭ سوڭىنا تامان عانا ۆياچەسلاۆ سەرديۋكوۆ «جەتىسۋعا» جەڭىستى جۇلىپ اپەردى.
دەرەككوز: استانا فۋتبول فەدەراتسياسى