سوندەرستىڭ كومانداسىنا گولوۆكيننىڭ جاراقاتتانىپ قالعانى ايتىلدى
«بيللي ايقاسقا بۇرىنعىداي دايىن، بارلىق قۇجاتتار ۇستەل ۇستىندە جاتىر، ءبىز ولاردىڭ قول قويۋىن كۇتىپ ءجۇرمىز. ءبىراق بىزگە گولوۆكيننىڭ جاراقاتتانىپ قالعانى ايتىلدى. بىزگە ەندى كۇتۋگە تۋرا كەلەدى. بيللي بۇل جەكپە- جەكتىڭ بولعانىن قالايدى، ءبىز قولدان كەلگەننىڭ بارلىعىن جاسادىق»، - دەدى ۋوررەن.
ايتا كەتەيىك، استانا قالالىق دەنە شىنىقتىرۋ جانە سپورت باسقارماسىنىڭ باسشىسى بەرىك مارجىقپايەۆ بۇل جەكپە-جەك 17 -شىلدە كۇنى وتەتىنىن ءمالىم ەتكەن بولاتىن. ونىڭ 30 مىڭ ورىندىق «استانا- ارەنا» ستاديونىندا وتەتىنىن جانە بيلەتتەر قۇنى شامامەن 10-15 مىڭ تەڭگە بولاتىنىن ايتقان ەدى.
الايدا GGG- دىڭ مەنەدجەرى ولەگ گەرمان اتالعان اقپاراتتى جوققا شىعاردى. «ءدال قازىر گولوۆكيننىڭ قازاقستانداعى جەكپە- جەگىنە قاتىستى ەشقانداي رەسمي اقپارات جوق. سول سەبەپتى ناقتى، ءتىپتى الدىن الا داتالار تۋرالى ايتۋعا بولمايدى. بيلەت باعاسى تۋرالى دا ءسوز قوزعاۋعا ەرتە. ال شىلدەنىڭ 17- كۇنگى داتاعا كەلەر بولساق، گەننادي قاتىساتىن بوكس كەشىنىڭ سەنبى كۇنى وتەتىنى بەلگىلى. ال شىلدەنىڭ 17 سى دۇيسەنبىگە كەلىپ تۇر. قازىر ناقتى اقپارات جوق. الداعى ۋاقىتتا قانداي دا ءبىر مالىمەت بولسا، ونى GGG كومانداسىنىڭ وكىلدەرى جاريالايتىن بولادى»، - دەدى گەرمان.
ءسال كەيىن ەلوردا اكىمدىگى گەننادي گولوۆكيننىڭ جەكپە-جەگىن وتكىزۋ تۋرالى اقپارات شىندىققا جاناسپايتىنىن ايتتى. ال جۋرناليستەرگە بۇرىس اقپارات بەرگەن استانا قالاسىنىڭ دەنە شىنىقتىرۋ جانە سپورت باسقارماسىنىڭ باسشىسى بەرىك مارجىقپايەۆقا ەسكەرتۋ جاسالدى.
اۆتور: ميرا تولەندى قىزى