جاقسى كەلىن قانداي بولۋى كەرەك؟
بۇل ونىڭ عانا ەمەس، ۇلكەندەردىڭ العىسىنا بولەر جاقسى جار الىپ، اتا- اناسىن باقىتقا بولەگىسى كەلەتىن، بالالارىنىڭ تاربيەسىندەگى قاينار بۇلاق بولاتىن جاردى اداسپاي تاپقىسى كەلەتىن كەز كەلگەن بوزبالانىڭ كوكەيىندەگى ساۋال بولار دەگەن ويعا كەلدىم. الدىڭعى «بەس ارۋعا عاشىق بول» تاقىرىبىمەن جاريالانعان ماتەريالىمىزدا جاقسى جار بولارلىق قىز بالانىڭ بويىنان تابىلۋى ءتيىس قاسيەتتەردى ۇسىنعان ەدىك. تاعى دا تولىقتىرا كەتەيىك.
كوپتىڭ كوڭىلىنەن شىعاتىن جاقسى كەلىننىڭ ءبىرىنشى بەلگىسى - اقجارقىندىعى. كەز كەلگەن كىسىنىڭ ءتىلىن تاۋىپ، ەرتەڭگى كۇنى ەنەسىنىڭ دە، قاينىسىنىڭ دا كوڭىلىنە كىربىڭ كەلتىرمەي، بالامەن بالاشا، ۇلكەنمەن ۇلكەن كىسىشە بايىپتىلىقپەن اڭگىمە جاراستىرا بىلەتىن جان قىز كەزىنەن وسىنداي ەلگەزەك بولادى. كورگەن كىسىسىنە كۇلىپ امانداسىپ، جىميىپ سويلەسەدى.
ەكىنشى بەلگىسى - پىسىقتىعى. مۇنى ورىندى- ورىنسىز سويلەپ قالاتىن پىسىقايلىقپەن شاتاستىرماۋ قاجەت. جەكە زاتتارىنا ۇقىپتى، سىرت كەلبەتىنە تازالىقپەن قارايتىن قىز ءۇي شارۋاسىندا دا تياناقتى بولادى. قازىر تاماقتىڭ ءارتۇرلى رەتسەبىن بىلمەيتىن بولسا دا، تابيعاتىنان پىسىق قىز ءوز باسىنا تۇسكەندە كەز كەلگەن شارۋانى دوڭگەلەتىپ اكەتەدى.
شاپشاڭدىعى. پىسىقتىقپەن قاتار جىلدام قوزعالۋ دا كەلىننىڭ باستى بەلگىلەرىنىڭ ءبىرى. اسا ماڭىزدى قاسيەت بولماعانىمەن، ونىڭ دا قاجەتتىلىگى بار. ۇيىڭىزگە اياق استىنان قوناق كەلىپ قالسا، باياۋ قوزعالاتىن كەلىن ءالى ءبىر ىستىق تاماعىن دايىنداپ ۇلگەرمەسە، كەلگەن كىسىلەردەن دە ىڭعايسىز، ەنەسى مەن ۇيدەگى ۇلكەندەردىڭ دە جۇيكەسىن جۇقارتۋى مۇمكىن. ءبىراق بۇل قاسيەتتى تاجىريبە شىڭدايدى. جاقسى كەلىن بولار قىز بالاجان بولادى. كىمنىڭ بالاسى بولسا دا مەيىرىممەن قاراپ، ءتىل تابىسا بىلەدى. بالا تاربيەسىنەن حاباردار بولىپ، جاسىنان ءوز وتباسىنان العان تاربيەسى مەن قوعام تاربيەسىن سارالاي جۇرەدى.
Massaget.kz