تيمۋر بەكمامبەتوۆ: مەن ءۇشىن وتانىمدا بۇل فيلمنىڭ قازاق تىلىندە كورسەتىلگەنى ماڭىزدى

الماتى. قازاقپارات - تيمۋر بەكمامبەتوۆتىڭ «العاشقىلار ءداۋىرى» فيلمى قازاقستان كينوتەاترلارىندا قازاق جانە ورىس تىلىندە كورسەتىلەدى، دەپ حابارلايدى قازاقپارات ءتىلشىسى.

 بۇل «Bazelevs» ستۋدياسىنىڭ قازاق تىلىنە اۋدارىلعان العاشقى فيلمى.

«مەن قازاقستاندا تۋىپ، 17 جاسىما دەيىن تۇردىم. ول كەزدە فيلمدەر قازاق تىلىندە مۇلدەم كورسەتىلمەيتىن، سەبەبى اۋدارىلمايتىن. قازاق تىلىنە كوپ كوڭىل بولىنبەدى، سودان مەن مىنە، وسىنداي انا تىلىندە سويلەي الاتىن ءبىراق، وتە ناشار سويلەيتىن «دۇرىس ەمەس» ادام بولىپ شىقتىم. سوندىقتان، مەن ءۇشىن كورەرمەننىڭ بۇل فيلمدى مەنىڭ وتانىمدا تەك ورىس تىلىندە ەمەس، مەملەكەتتىك تىلدە دە كورگەنى ماڭىزدى»، - دەدى كينوكارتينا پروديۋسسەرى تيمۋر بەكمامبەتوۆ.

 ايتا كەتەيىك، فيلمگە گولليۆۋد فيلمدەرى مەن مۋلتفيلمدەرىن قازاقشا سويلەتىپ جۇرگەن تاجىريبەلى اكتەرلار دۋبلياج جاسادى. «بولاشاق» كورپوراتيۆتى قورىنىڭ قولداۋىمەن 2011 -جىلدان بەرى مەملەكەتتىك تىلدە 18 شەتەلدىك فيلمگە دۋلبياج جاسالدى.

«ءبىز قىسقا ۋاقىت ىشىندە ەۆگەني ميرونوۆ، كونستانتين حابەنسكي سومداعان تاماشا رولدەرگە دۋبلياج جاساۋ قاجەت بولدى. ەكى اپتا، 15-20 كۇننىڭ ىشىندە ءبىز اۋىر جۇمىستى اتقارىپ شىقتىق. ءتۇپنۇسقادا كورەتىن كورەرمەندەي قازاق تىلىندە دە فيلمنەن اسەر الۋ ءۇشىن دۋبلياج اكتەرلەرى ەكرانداعى ورىنداۋشىلارمەن قاتار رولدە ويناپ شىعۋى كەرەك. ءبىز اكتەرلارىمىزدى كوسموستا وزدەرى جۇرگەندەي سەزىنۋى ءۇشىن ابدەن دايىندادىق»، - دەدى دۋبلياج رەجيسسەرى ايجان جامشيتوۆا.

 ونىڭ ايتۋىنشا، ءتۇپنۇسقاداعى ماعىنانى بەرۋ ءۇشىن فيلم اۋدارماسىن ەڭ مىقتى ماماندار اتقارىپ شىققان. فيلم ومىردە بولعان وقيعاعا نەگىزدەلىپ تۇسىرىلگەن. وندا 1965 -جىلى 18 - ناۋرىز كۇنى الەكسەي لەونوۆتىڭ «ۆوستوك-2» كەمەسىمەن اشىق عارىش كەڭىستىگىنە العاش شىققان تاريحي وقيعاسى باياندالادى.

 اۆتور: الماس مۇقاش ۇلى