قىزىلوردالىق مەكتەپ وقۋشىسى جينالمالى كوپىر ويلاپ تاپتى
ونەرتاپقىشتىڭ ويىنشا، بۇل كوپىر داريانىڭ ارعى بەتىندەگى اعايىندار ءۇشىن تاپتىرماس دۇنيە. قىس تۇسە سىرداريا وزەنىنىڭ ارعى بەتىندە تۇراتىن تۇرعىندار باسىقارا اۋىلى ارقىلى اينالىپ، ابىگەرگە ءتۇسىپ جاتادى. «قارلان»، السەيىت وتكەلى مەن اباي اۋىلىنىڭ تۇسىنداعى قالقىمالى كوپىرلەر وزەنگە مۇز قاتىپ، سەڭ جۇرسە الىنىپ تاستالادى.
تۇرعىندار ءۇشىن تۇيتكىلدى ماسەلەگە اينالعان بۇل ماسەلەنىڭ شەشىمىن ىزدەۋ جاس ونەرتاپقىشتى جينالمالى، قۇراستىرمالى كوپىر ويلاپ تابۋعا يتەرمەلەدى. اۋداندىق وقۋشىلار ءۇيىنىڭ «ەلەكتروتەحنيكا» ۇيىرمەسىنە قاتىساتىن سەرىك ءوز ويىن جەتىلدىرىپ، ۇيىرمە جەتەكشىسى قايرات ورازوۆقا جەتكىزەدى. شاكىرتىنىڭ حالىقتىڭ يگىلىگىنە جارايتىن يدەياسىنا قولداۋ بىلدىرگەن ۇستازى ءوزىنىڭ اقىل- كەڭەسىن ايامايدى. قۇراستىرمالى- جينالمالى كوپىر ەكى بولىكتەن تۇرادى. تەمىردەن قۇراستىرىلاتىن كوپىر وزەننىڭ ەكى بەتىنە ورنالاستىرىلادى. پۋلت ارقىلى باسقارىلاتىن ول قاۋىپتى جاعداي تۋىنداعاندا جينالادى.
قازىرگى قالقىمالى كوپىرلەردەن باستى ايىرماشىلىعى وسىندا. كوپىردىڭ ۇزىندىعى قاجەتىنە قاراي 40-50 مەترگە دەيىن جەتسە، ەنى ەكى اۆتوكولىك ەركىن سياتىنداي بولادى. ۇستىنەن 10 توننالىق ءتورت ماشينا وتسە دە مىڭق ەتپەيدى. كوپىردىڭ قۇرىلىسىنا قاجەتتى ماتەريالداردىڭ بارلىعى دا اۋداننان تابىلادى.
تاعى ءبىر ەرەكشەلىگى، كوپىرگە ەشقانداي ەلەكتر باعاندارىن تارتىپ، اۋرە بولمايسىز. قاسىنداعى قوسىمشا ۆاگون قاجەتتى ەلەكتر ەنەرگياسىن كۇن كوزىنەن الادى. سونداي- اق، بۇل كوپىر قارجىلىق جاعىنان دا وتە ءتيىمدى. قولعا الام دەۋشى كاسىپكەرلەر تابىلسا، ءبىر جىل ىشىندە بار- جوعى 40-50 ميلليون تەڭگەگە ورناتا الادى. كوپىردىڭ قۇرىلىسىنا كەتكەن شىعىندى 5 جىلدىڭ كولەمىندە قايتارىپ الۋعا مۇمكىندىك بار. ول ءۇشىن بار- جوعى جەڭىل اۆتوكولىككە 100 تەڭگە، اۋىر كولىكتەرگە 150 تەڭگە السا جەتىپ جاتىر. راسىندا، كاسىپكەر ازاماتتار جاس ونەرتاپقىشتىڭ ويلاپ تاپقان كوپىرىن ىسكە اسىرسا، كوپ ماسەلە شەشىلگەن بولار ەدى.
اۆتور: ەلۋباي اۋەزوۆ