قىزمەتتە ءاردايىم «بولاشاق» تۇلەكتەرىن كوتەرمەلەيتىن بولادى

استانا. قازاقپارات - قازاقستاننىڭ مەملەكەتتىك حاتشىسى، مامانداردى شەتەلدە دايارلاۋ رەسپۋبليكالىق كەڭەسىنىڭ ءتوراعاسى گۇلشارا ءابدىقالىقوۆا «بولاشاق» باعدارلاماسىنداعى وزگەرىستەر تۋرالى ايتىپ بەردى، دەپ حابارلايدى قازاقپارات.

 «قازىر ءبىز تەرەڭ تالداۋ جاساعىمىز كەلىپ وتىر. «بولاشاق» تۇلەكتەرى قايدا جۇمىس ىستەپ جاتىر، ەل ەكونوميكاسىنا تيگىزىپ جاتقان ۇلەستەرى قانداي، كىمدى مانساپ جولىندا كوتەرۋگە تۇرادى دەگەن سياقتى ساۋالدارعا جاۋاپ تاپقىمىز كەلەدى. سوندىقتان وسى باعىتتا ناقتى جۇمىستار جاسالاتىنى انىق»، - دەپ اتاپ ءوتتى ول.

گۇلشارا ءابدىقالىقوۆا ناقتىلاپ وتكەنىندەي، مۇنداي قادامدار «بولاشاق» پرەزيدەنتتىك باعدارلاماسىن ارى قاراي جەتىلدىرۋ اياسىندا جاسالماق. ونىڭ ۇستىنە، گرانت يەگەرلەرىن انىقتاۋ بارىسىندا ەڭ دارىندى جاستارعا كوڭىل اۋدارىلادى، ولاردى الەم بويىنشا رەيتينگتەرى ەڭ جوعارى 70 ۋنيۆەرسيتەتكە جىبەرۋ كوزدەلگەن.

 «ءبىز بيىلدان باستاپ، قۇجات قابىلداۋ راسىمىنە وزگەرىستەر ەنگىزەمىز. بۇرىنعى قابىلداۋ ءتارتىبى وتە كۇردەلى بولىپ كەتكەن. ۇمىتكەرلەر نەگىزىنەن ەسسە تاپسىراتىن بولادى. ءبىز ءوزىن- ءوزى دامىتۋدا ۇلكەن الەۋەت تانىتقان شىعارماشىل جاستارعا كوڭىل بولەمىز»، - دەدى مەملەكەتتىك حاتشى.

 ونىڭ ەسكە سالىپ وتكەنىندەي، باعدارلاما ومىرگە كەلگەلى بەرى، 24 جىلدىڭ ىشىندە  12271 ستيپەنديا تاعايىندالعان. 9427 مامان ديپلومدارىن الىپ ۇلگەردى. ولاردىڭ ىشىندە 40 پايىزى ينجەنەرلىك- تەحنيكالىق، 37 پايىزى - الەۋمەتتىك جانە 14 پايىزى - گۋمانيتارلىق باعىتتار بويىنشا ءبىلىم الىپ كەلگەن.

«تۇلەكتەردىڭ 98 پايىزى جۇمىسپەن قامتىلدى. ولاردىڭ ىشىندە 55 پايىزى - مەملەكەتتىك ورگانداردا، 30 پايىزى - جەكە سەكتوردا، كۆازيمەملەكەتتىك كومپانيالاردا، 12 پايىزى حالىقارالىق ۇيىمداردا جۇمىس ىستەيدى. قازىرگى ۋاقىتتا 1375 ستيپەنديات ءبىلىم الىپ جاتىر. ولاردىڭ 50 پايىزى -  ۇلى بريتانيا مەن يرلانديادا، 34 پايىزى ا ق ش پەن كانادادا، 7 پايىزى - قۇرلىقتىق ەۋروپا ەلدەرىندە»، - دەدى گۇلشارا ءابدىقالىقوۆا.

 اۆتور: جاسۇلان جولدىبايەۆ