ەجەلگى سارايشىقتى كۇزدە تاماشالاي الاتىن شىعارمىز - ارحەولوگ ساماشيەۆ
«ءبىز قازعاندا سۋدان بەرى قاراي 20 مەتر بولعان. قازىر سول اراداعى كونە عيماراتتاردى تۇگەل سۋ شايىپ كەتتى. سوندا قاراڭىز، 1996 -جىلدان بەرى قاراي سارايشىق قالاسىنىڭ 20-30 مەتر ۋچاسكەسى سۋدىڭ استىنا كەتىپ قالدى. ال ونىڭ الدىندا سوناۋ 1937 -جىلى العاشقى قازبا جۇمىستارىنان باستاپ شاھاردىڭ 100-150 مەتر جەرىن سۋ شايىپ كەتۋى ابدەن مۇمكىن. سول كەزدە نەگىزگى ۇلكەن سارايلار، جاقسى عيماراتتار، كەرۋەن سارايلار، مونشالار، مەشىتتەرى بولعان. سودان كەيىن كىرپىش پەن قۇمىرا جاسايتىن پەشتەر - ءبارى- ءبارى سۋدىڭ استىنا كەتتى. دەگەنمەن، قالعان جاعىندا دا ونداي قۇرىلىستار بولۋى مۇمكىن. سارايشىقتا تيىن سوققان ورىن بولعان. ونىڭ دا ورنى بار سياقتى. سوسىن قاسىم حاننىڭ جەرلەنگەن ورنى، ول كەتىپ قالدى ما، جوق پا، وسىنى انىقتاۋىمىز قاجەت. ەندى، ءۇمىتىمىز بار. وزەن جاعاسىن بەكىتۋ جۇمىستارى مامىرعا دەيىن اياقتالادى دەگەن جوسپار بار. ويتكەنى بيىل قار قالىڭ ءتۇستى. سول سەبەپتى قازىر كۇنى- ءتۇنى جۇمىس ىستەپ جاتىر. ايتپەسە، قىرۋار قارجى دالاعا كەتەدى»، - دەدى ارحەولوگ زەينوللا ساماشيەۆ جۋرناليستەرگە بەرگەن سۇحباتىندا.
عالىمنىڭ ايتۋىنشا، ەسكى قالانىڭ ءبىراز جەرى ءالى دە بار. الايدا ناقتى اۋدانى بەلگىسىز. سەبەبى ول جەر تولىعىمەن زەرتتەلمەگەن. وزەن جاعاسىن بەكىتۋ جۇمىستارى اياقتالعاننان كەيىن ارحەولوگتار ءوز جۇمىسىنا كىرىسەدى. ولاردىڭ ارتىنان رەستاۆراتورلار ءجۇرىپ، سارايشىق قالاسىن قالپىنا كەلتىرەتىن بولادى.
«ءسويتىپ، كونسەرۆاتسيا جۇمىستارى اتقارىلىپ، اسپاناستى مۋزەي پايدا بولادى. ونى كۇزدە كورە الاتىن شىعارمىز»، - دەپ اتاپ كورسەتتى ارحەولوگ ساماشيەۆ.
ايتا كەتەيىك، بۇگىن استانادا «سارايشىق - ۇلى قالا تاريحى» تاقىرىبىندا حالىقارالىق كونفەرەنسيا باستالدى. ءماجىلىستىڭ اشىلۋ راسىمىندە ءسوز سويلەگەن ق ر مادەنيەت جانە سپورت ءمينيسترى ارىستانبەك مۇحامەدي ۇلى اعىمداعى جىلدا سارايشىق قالاسىنىڭ كونسەرۆاتسيالاناتىنىن جەتكىزدى.
اۆتور: ارمان اسقاروۆ