مۇحامەدي ۇلىنا جوشى حان كەسەنەسىنە نازار اۋدارۋ ۇسىنىلدى
بۇل تۋرالى بۇگىن سەناتتا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مادەنيەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تالقىلاۋ كەزىندە سەناتور سەرگەي ەرشوۆ ءمالىم ەتتى، دەپ حابارلايدى قازاقپارات.
ۇلىتاۋداعى تاريحي ەسكەرتكىشتەردى كەڭىنەن ناسيحاتتاۋ ماسەلەسىنە توقتالعان سەناتور: «ول جەردە ەرەكشە ەسكەرتكىشتەر بارشىلىق. وسى وڭىردە جوشى حاننىڭ ەسكەرتكىشى بار ەكەنىن جەكە ءوز باسىم 1995-جىلعا دەيىن بىلمەگەن ەدىم. مەن تاريحشى ەمەسپىن، ءبىراق تا شىڭعىسحاننان بۇگىندە ەشتەڭە دە قالمادى، ياعني ونىڭ جەرلەنگەن جەرى بەلگىسىز. ال شىڭعىسحاننىڭ ۇلكەن ۇلىنىڭ كۇمبەزى ءبىزدىڭ ەلدە ەكەنى ءمالىم. كەزىندە وسى تاريحي نىساننىڭ رەستاۆراتسياسىنا قارجى بولىنگەن ەدى، ول جەردە اۋقىمدى شارالار اتقارىلدى. بۇگىندە وندا نە بولىپ جاتقانىن بىلەسىز بە؟ ءدال سول جەردە قازىرگى زامانعى بەيىتتەر پايدا بولعان. سونىمەن بىرگە بۇل مازارلار تاريحي نىسانداردى كولەڭكەسىندە قالدىرىپ وتىر. جاقىندا وندا دوستارىمدى الىپ بارىپ، تاريحي نىساندارمەن تانىستىردىم. ولار شىنىمەن دە جوشى حان كەسەنەسىن كورىپ تاڭدانىپ قالدى»، - دەدى دەپۋتات.
وسى ورايدا سەناتور ەرشوۆ ق ر مادەنيەت جانە سپورت ءمينيسترى ارىستانبەك مۇحامەدي ۇلىنا قاراتىپ ايتقان سوزىندە بۇل بىرەگەي تاريحي ەسكەرتكىشتى ساقتاپ قالۋعا ەرەكشە ءمان بەرۋ كەرەكتىگىن اتاپ ءوتتى.
بۇل تۇرعىدا ول اتالعان ماسەلە جايىندا مينيسترلىككە حات جازعانىن، الايدا تولىققاندى جاۋاپ الماعانىن جەتكىزدى.
ايتا كەتەرلىگى، ۇلىتاۋ - مىڭداعان جىلدار بويى اتا-بابالارىمىزدىڭ ارمانىن اسقاقتاتقان كيەلى ورىن. ونداعى ءاربىر تاۋ مەن تاستىڭ ءوزى قازاق حالقىنىڭ تاريح-تامىرىنان تەرەڭ سىر شەرتەتىن، ەلدىگىمىزدىڭ ايتۋلى كەزەڭدەرىنىڭ كۋاگەرى سانالادى. ونداعى حان ورداسىندا قازاقتىڭ بىرنەشە حانى تاقتا وتىرعان. تولە ءبي، قازىبەك ءبي، ايتەكە ءبي باستاعان يگى جاقسىلار ابىلايدى وسى وردادا اق كيىزگە كوتەرىپ، حان سايلاعان. ال 1993-جىلى تاۋەلسىز قازاقستان رەسپۋبليكاسىنىڭ پرەزيدەنتى ن. ءا. نازاربايەۆقا وسى حان ورداسىندا قۇرمەت كورسەتىلگەن. جالپى ۇلىتاۋ ءوڭىرى تاريحي ەسكەرتكىشتەرگە تولى.
اۆتور: رۋسلان عابباسوۆ