بۇرىنعى ناشاقور قالاي ەل تانىعان ميلليونەرگە اينالدى - فوتو
ونىڭ كوكاينگە ابدەن تاۋەلدى بولعانى سونشا، دەنەسىنىڭ ءبارىن جارا باسىپ كەتكەن.
بۇل تۋرالى BBC حابارلايدى.
«مەنى بىرنەشە رەت تۇتقىنداعانى سونشالىق، كەيبىرى ءتىپتى ەسىمدە دە جوق. ەسىرتكىگە وتىرعانىم سونشا، ۇيىقتاۋدىڭ ءوزى ماعان اۋىر ەدى»، - دەيدى حاليل.
ول بىرنەشە رەت ەسىرتكىنى تاستاۋعا ۇمتىلادى. ءبىراق، ۇنەمى تاۋەكەلى جەتپەي قالا بەرەتىن. ءبىر جولى شامادان تىس پايدالانىپ ەس-ءتۇسسىز قۇلاعاننان كەيىن ول ءومىرىن وزگەرتۋ كەرەك دەپ شەشەدى. سودان باستاپ ساۋىقتىرۋ ورتالىعىندا ءتورت اي ەم قابىلداعان ۋاقىتتان بەرى بىردە-ءبىر مارتە ەسىرتكىگە جولاعان ەمەس.
ول ەسىرتكىنى ۇمىتىپ قانا قويماي، بيزنەس اشىپ ميلليونەر بولىپ تا ۇلگەردى. پايدالى تاعامداردى ناسيحاتتايتىن ونىڭ كومپانياسى Sunlife Organics دەپ اتالادى. كومپانيانىڭ جىل سايىنعى تابىسى 6 ميلليون دوللار. ونىمدەر التى كافە-بارلاردا ساتىلادى. ولار - شىرىندار، جەكە كيىمدەر جەلىسى. سونىمەن قاتار، كومپانيانىڭ ۆەب-سايتى ارقىلى دا ساۋدا جاسالا بەرەدى. الداعى ۋاقىتتا ا ق ش پەن جاپونيادا توعىز ساۋدا نۇكتەسى اشىلادى دەپ جوسپارلانىپ وتىر.
قازىر 46 جاستاعى حاليلدىڭ جەكە ۇشاعى بار. ونىڭ باسىنان كەشكەندەرى تۇتاس فيلم تۇسىرۋگە جەتىپ جاتىر. وگايو شتاتىندا تۋعان، حاليلدىڭ اناسى - پولياك ەۆرەيى، ال اكەسى - مۇسىلمان. بالالىق كەزى دە جەڭىل بولماعان: مەكتەپتى تاستاپ كەتىپ، ەشقانداي ءبىلىم الا المايدى. 1992-جىلى 21 گە تولعان سوڭ لوس-اندجەلەسكە بارىپ، كينوجۇلدىزعا اينالعىسى كەلەدى.
الايدا اكتەرلىك ومىرگە اياق باسپاي، ول جەرگىلىكتى مۋزىكالىق توپتىڭ قاتارىندا ونەر كورسەتۋمەن شەكتەلگەن. ال تابىستى كولىك جۋىپ تاباتىن. سول كەزدە ەسىرتكىنىڭ ءدامىن تاتىپ، ءومىرىنىڭ استان-كەستەڭى شىعادى. اقىرىندا دالاعا تۇنەپ، ەسىرتكى ساۋدالايتىن كۇنگە جەتەدى.
ءبىراق، ءوز-وزىنە كەلىپ ەسىرتكىنى تاستاعاننان كەيىن بىردەن بىرنەشە جەردە جۇمىس ىستەي باستاعان.
«مەن اپتاسىنا جەتى كۇن، كۇنىنە 16 ساعات جۇمىس ىستەپ اقشا تاپتىم»، - دەيدى ول. ءبىر كۇنى وگايوداعى ەسكى دوسىمەن كەزدەسىپ، جەكە جەمىس شىرىنى ءوندىرىسىن اشۋ تۋرالى يدەياسىن ايتادى. 2007-جىلى ءۇيدى جالعا الىپ، Riviera Recovery جەكە رەحابىن اشادى. وندا كليەنتتەر ايىنا 10 مىڭ دوللار تولەپ كەلەتىن.
ءوزىنىڭ ەمدەلۋشىلەرى ءۇشىن حاليلدىڭ ساۋىقتىرۋ ورتالىعى «روسوماحا» دەگەن اتاۋمەن جەمىس شىرىنىن ءوندىرىپ، ۇسىنادى. ونىڭ قۇرامىندا بانان، بالارا ءسۇتى، ۇساق كوكنار تۇيىرشىگى بولدى.
وسى سۋسىننىڭ ارقاسىندا ونىڭ اتاعى الىسقا كەتىپ، كليەنتتەر سانى ارتا باستاعان. سۇرانىس كوبەيگەننەن كەيىن 2011-جىلى دوسى ەكەۋى Sunlife Organic كومپانياسىنىڭ نەگىزىن قالايدى.
كومپانيا العاشقى دۇكەندەرىن ماليبۋدا اشقان. العاشقى جىلى-اق تابىس 1 ميلليون دوللارعا جەتەدى. قازىر التى كافەدە 200 ادام جۇمىس ىستەيدى. سۋسىننان بولەك، پايدالى تاعامدار مەن كيىمدەر دە ساتىلىپ جاتىر.
Deutsche Bank-تىڭ نيۋ-يوركتەگى ءبولىمىنىڭ ساراپشىسى روب نازار حاليلدىڭ وقيعاسى - مىنەزدى ادامنىڭ ارەكەتى دەيدى. «سەندە قانداي ءبىلىم، كاسىبي تاجىريبە ەكەنى ماڭىزدى ەمەس، ماڭىزدىسى مىنەز، شەشىم قابىلداۋ» دەيدى ول.
2015-جىلى حاليل ءوزىنىڭ اۆتوبيوگرافياسىن جازىپ شىعاردى. وعان «مەن ءولۋدى ۇمىتتىم» دەگەن ات قويعان.
«مەن ءوزىمدى ەرەكشە اقىلدىمىن دەپ سانامايمىن. مەن تەك نە نارسەگە دە بار كۇشىمدى سالا جۇمىس ىستەيمىن»، - دەيدى ول.