وڭتۇستىك قازاقستاندا ورىك گۇلدەپ جاتىر

شىمكەنت. قازاقپارات - وڭتۇستىكتە ورىك گۇلدەپ جاتىر. تاۋىق جىلىنىڭ قىسى ايماق ءۇشىن قيىن بولىپ، ءبىراز ابىگەرگە تۇسىرگەنى بەلگىلى.

دەگەنمەن ناۋرىز ايىندا كۇن جىلىنىپ، جەر كوگەرە باستادى. كۇنى كەشە وڭىردە اۋا رايى 27 گرادۋسقا دەيىن جىلىندى.

بۇگىن دە تەمپەراتۋرا 20 گرادۋسقا دەيىن كوتەرىلگەن. مامانداردىڭ سوزىنشە، ورىكتىڭ ويانۋى ءۇشىن اۋا رايى ءبىر اپتادان اساتىن ۋاقىت 10 گرادۋس شاماسىندا جىلى بولىپ تۇرۋى كەرەك. ال اعاش ءبۇر جارىپ، گۇل اشۋى ءۇشىن ويانعان سوڭ ءبىر اپتا تەمپەراتۋرا 20 گرادۋستاي ىسۋى ءتيىس.

جەمىس اعاشتارى ءسال كەش گۇلدەيدى ەكەن. ولار اۋا رايىنىڭ تۇراقتانۋىن كۇتەدى ەكەن. بولماسا سۋىققا ۇرىنىپ، ءۇسىپ كەتۋى مۇمكىن. دەگەنمەن جەرگىلىكتى تۇرعىندار ءساۋىر ايلارىندا اياز بولىپ، كوپ اعاشتىڭ گۇلى ءتۇسىپ قالماسا ەكەن دەپ الاڭداۋلى.

سەبەبى، الدىڭعى جىلدارى جەمىس اعاشتارى گۇلدەگەن كەزدە قاردىڭ تۇسۋىنەن ءونىم ءۇسىپ كەتكەن بولاتىن. اۋا رايىن بولجايتىن ماماندار ءساۋىر ايىندا ەلىمىزگە سالقىن تسيكلون كەلەتىنىن ايتادى. ءبىراق قاتتى سۋىق بولمايدى ەكەن.

اۆتور: اينۇر اقبايەۆا