ەلشى: وڭتۇستىك كورەيادا ەكى مىڭ قازاقستاندىق زاڭسىز ءجۇر
بۇل تۋرالى بۇگىن استاناداعى باسپا ءسوز ءماسليحاتىندا كورەيا رەسپۋبليكاسىنداعى قازاقستاننىڭ توتەنشە جانە وكىلەتتى ەلشىسى دۋلات باقىشەۆ ءمالىم ەتتى، دەپ حابارلايدى قازاقپارات.
«قازىرگى كەزدە وڭتۇستىك كورەيادا قازاقستاننان بارعان ەكى مىڭعا جۋىق ادام زاڭسىز ءجۇر. جالپى، باسقا ەلدەردەن دە ادامدار وسى مەملەكەتكە بارىپ، قالىپ جاتىر»، - دەدى ول.
ونىڭ سوزىنە قاراعاندا، سوڭعى كەزدە كەيبىر قازاقستاندىقتار كورەياعا ۆيزاسىز بارۋ مۇمكىندىگىن پايدالانا وتىرىپ، سوندا قالىپ جاتىر.
«وسىعان بايلانىستى زاڭ بۇزۋشىلىققا بارعانداردى انىقتاۋ بويىنشا كۇشەيتىلگەن جۇمىستار قولعا الىندى. كەز كەلگەن جاعدايدا، ياعني ادامنىڭ ارەكەتى دۇرىس نەمەسە بۇرىس بولسا دا، ەلشىلىكتىڭ ماقساتى ءبىزدىڭ ازاماتتاردىڭ مۇددەلەرى مەن قۇقىقتارىن قورعاۋعا بايلانىستى بولادى. ءبىزدىڭ ەلشىلىكتە ءتورت ديپلومات، ءبىر كونسۋل جۇمىس ىستەيدى. كونسۋلىمىز دەمالىسسىز جۇمىس ىستەيتىنىن ايتا كەتكەن ءجون. ول كۇندە اۋەجايدا بولادى. سونىمەن قاتار ادامدار ەمدەلۋ ءۇشىن دە وسى ەلگە بارادى. سوندىقتان ديپلوماتتاردىڭ جۇمىسى قارقىندى»، - دەدى ەلشى.
ونىڭ ايتۋىنشا، اپتا سايىن پروبلەمالار تۋىندايدى. ءاربىر وقيعا بويىنشا وڭتۇستىك كورەيا سىرتقى ىستەر مينيسترلىگىنە نوتا جىبەرىلىپ، وقيعانىڭ ءمان-جايىن انىقتايمىز. سونداي-اق كەيبىر ماسەلەلەر سول جەردە شەشىلىپ جاتادى.
«ءبىزدىڭ ماقسات قازاقستان ازاماتتارىنىڭ مۇددەلەرى مەن قۇقىقتارىن قورعاۋعا نەگىزدەلگەن. كوپ جاعدايلاردا ادامداردى نەگىزگى سەبەپتەرمەن ۇستايدى، سەبەبى ولار ءوزىنىڭ ساپارى تۋرالى تولىق اقپارات بەرمەيدى»، - دەپ ءتۇسىندىردى باقىشەۆ.
اۆتور: رۋسلان عابباسوۆ