توقتار تولەشوۆتىڭ بۇرىنعى كۇزەتشىسىنە قاتىستى سوت ۇكىمى شىقتى

شىمكەنت. قازاقپارات - وڭتۇستىك قازاقستان وبلىسىندا توقتار تولەشوۆتىڭ بۇرىنعى كۇزەتشىسىنە قاتىستى سوت ۇكىمى شىقتى.

وڭىردەگى قىلمىستىق ىستەر جونىندەگى مامانداندىرىلعان اۋدانارالىق سوتى 35 جاستاعى ايىپتالۋشى رۋسلان ەرگەبايەۆتى ءۇش جىلعا باس بوستاندىعىنان ايىردى، دەپ حابارلايدى قازاقپارات ح ا ا ءتىلشىسى.

ءۇش ايعا سوزىلعان سوت وتىرىسى بارىسىندا كۇزەتشىنىڭ ادام ۇرلاۋ، كۇش قولدانۋ سياقتى قىلمىستارعا قاتىستىلىعى تولىق دالەلدەنگەن.

«توقتار تولەشوۆ ءوزىنىڭ بەدەلى مەن قىزمەتىن پايدالانا وتىرىپ، ۇيىمداسقان قارۋلانعان توپتى (باندا) قۇرعان. ولاردىڭ مۇشەلەرى مەن قاتار ەرگەبايەۆ تا سول توپقا كىرەدى. الدىن الا ءسوز بايلاسۋدىڭ ارقاسىندا ولار كريمينالدىق قىلمىستاردى جاساۋمەن، ادامداردى ۇرلاۋمەن اينالىسقان. ءبىر ەپيزود بويىنشا ادام ۇرلاعان، ەكىنشى ەپيزود بويىنشا باسقا ءبىر ادامدى سوققىعا جىعىپ، پىشاقپەن جەڭىل جاراقاتتاعان. ءبىراق ول ادامدى ولمەگەن، ونى ولمەشى ەتىپ ساباعان. وسىلايشا ادامداردى جازالاپ وتىرعان. ەرگەبايەۆتىڭ ءرولى كولىك جۇرگىزىپ وتىرعان، قاجەت بولعان جاعدايدا كۇش كورسەتەدى. سونداي قىلمىستاردى 2012-2015-جىلدار ارالىعىندا بىرنەشە رەت جاساعان بۇل توپتىڭ مۇشەلەرى»، - دەيدى ىسكە قاتىسقان پروكۋرور جاسۇلان ءادىلباي ۇلى.

وبلىستىق پروكۋراتۋرانىڭ باسقارما باستىعى ورىنباسارىنىڭ سوزىنشە، قىلمىستىق توپتىڭ مۇشەلەرى ءبىر جابىرلەنۋشىنى التى اي بويى ازاپتاعان.

«ءبىر جابىرلەنۋشىنى تانىستارىنىڭ ولىمىنە قاتىسى بار دەپ كۇدىكتەنگەن. سول ءۇشىن ول ادامدى ۇستاپ اكەلىپ، التى اي بويى ازاپتاپ، قيناعان. سول ولىمگە قاتىسى بارلىعىن انىقتاماق بولىپ، ۇرىپ-سوققان. جالدامالى پاتەرلەردە ۇستاپ، قورقىتقان. سول كەزدە رۋسلان ەرگەبايەۆ جابىرلەنۋشىنى تاسىمالدايتىن كولىك جۇرگىزۋشىسى بولعان. سوت بارىسىندا ونىڭ ۇرلانعان ادامدى قيناپ، كولىككە وتىرعىزىپ جۇرگەنى دالەلدەندى»، - دەدى جاسۇلان ءادىلباي ۇلى.

الايدا تەرگەۋ بارىسىندا ايىپتالۋشىنىڭ تاماعى قاتەرلى ىسىك اۋۋىنا شالدىققانى انىقتالادى. ول بىرنەشە اي بويى اۋرۋحانالاردا جاتىپ، ەم قابىلدايدى. سوت ءۇش ايعا سوزىلسا، سونىڭ ەكى ايىندا ول ەمدەلىپ جۇرگەن. سوندىقتان ايىپتالۋشىنىڭ ءىسى تولەشوۆتىڭ قاراماعىنداعىلاردان بولەكتەنىپ، تۇرعىلىقتى مەكەنجايى بويىنشا قارالعان.

دەنساۋلىعىنا بايلانىستى قاماۋعا الىنباي، كەپىل تۇرىندە ۇيىنە جىبەرىلگەن. سوت ۇكىمىن شىعارۋ كەزىندە دە ونىڭ اۋىر دەرتكە شالدىققانى ەسكەرىلىپ، جازاسى جەڭىلدەتىلگەن. ال، بىرگە قىلمىس جاساعان سىبايلاستارى 4-5 جىلدان جازا ارقالاپ كەتكەن بولاتىن.

«ايىپتالۋشى قىلمىستىق كودەكستىڭ 268، 125، 107- باپتارىمەن كىنالى دەپ تانىلسىن. ونىڭ جاساعان قىلمىسىنا وكىنۋ، كىناسىن تولىق مويىنداۋ، تەرگەۋگە قولعابىس ەتۋ جاعدايلارى ەسكەرىلىپ، ءۇش جىلعا باس بوستاندىعىنان ايىرۋ جازاسى قولدانىلسىن.

جازاسىن قاتاڭ تارتىپتەگى كولونيادا ءوتۋ تاعايىندالسىن. ۇكىممەن كەلىسپەگەن جاعدايدا نارازىلىق كەلتىرۋگە بولادى»، - دەدى سوتتا وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىنىڭ ءتوراعاسى جانىبەك سەيتجاپپاروۆ.

ەستەرىڭىزگە سالايىق، شىمكەنتتىك كاسىپكەر توقتار تولەشوۆ 16 اۋىر قىلمىس جاساعانى، مەملەكەتتىك توڭكەرىس ۇيىمداستىرماق بولعانى ءۇشىن كىنالى دەپ تانىلىپ، 21 جىلعا سوتتالعان بولاتىن. سونداي-اق ونىڭ 25 سىبايلاسى 3 پەن 7 جىل ارالىعىندا باس بوستاندىعىنان ايىرىلعان ەدى.

اۆتور: اينۇر اقبايەۆا