قازاقستاندا لاڭكەستىكتىڭ ينتەرنەت ارقىلى ناسيحاتتالۋىن توقتاتۋ مۇمكىن بولماي وتىر
باستالعان «تەرروريستىك جانە وزگە دە ترانس ۇلتتىق سيپاتتاعى قىلمىستاردى جاساۋ ماقساتىندا ينتەرنەت جەلىسىن پايدالانۋمەن بايلانىستى ىستەردى قىلمىستىق قۋدالاۋ جانە سوتتا قاراۋ پراكتيكاسى» تاقىرىبىنداعى ايماقتىق سەميناردا ق ر جوعارعى سوتىنىڭ سۋدياسى داۋلەن نۇرالين.
«وسىدان 10 جىل بۇرىن تەرروريزم تۋرالى تەك شەتەلدىك ماتەريالداردان تانىسىپ جۇرسەك، قازىر قازاقستاندا دا اۋىر قىلمىستار جاسالىپ جاتىر. سوندىقتان، بۇگىن ءبىز شەتەلدىك ماماندارمەن تاجىريبە الماسا وتىرىپ، سوتقا دەيىنگى تەرگەۋ، سوتتا قاراۋ ماسەلەسىن تالقىلاماقپىز. وزدەرىڭىزگە بەلگىلى، بۇل باعىتتا قازاقستان زاڭدارىنا وزگەرىستەر ەنگىزىلدى. زاڭ بويىنشا، تەرراكتىنى ۇيىمداستىرىپ، وعان بەلسەندى مۇشە بولعان ادامداردى جانە شەت ەلگە بارىپ سوعىسقا قاتىسقانداردىڭ كىناسىن تولىق دالەلدەۋ ارقىلى قاتاڭ جازا قولدانۋ ماسەلەلەرى قازىرگى ۋاقىتتا جۇزەگە اسىپ وتىر»، - دەدى ول.
داۋلەن نۇرالين لاڭكەستىككە قاتىستى اۋىر قىلمىستاردىڭ كوبى وسى ينەرنەتتى قولدانۋمەن بايلانىستى ەكەنىن ايتتى.
«ينتەرنەتتە تەرراكتىنى قالاي ۇيىمداستىرۋ قاجەتتىگى ايتىلعان ۋاعىزدار ارقىلى جاستاردى تارتۋ فاكتىلەرى بار. ينتەرنەت ارقىلى لاڭكەستىكتى ناسيحاتتاۋدى تولىعىمەن توقتاتۋ مۇمكىن بولماي وتىر. اقتوبەدە بولعان تەرراكتىدە ۇيىمداستىرۋشىلار ينتەرنەتتەگى ماتەريالداردى جيناقتاپ، بىرگە ناماز وقيتىن ادامدارعا ۇسىنعانى انىقتالدى. بىزدە باس پروكۋراتۋرادا سوتتىڭ شەشىمىمەن قازاقستاندا قۇرىلمايتىن، قۇرىلسا تاراتىلاتىن تەررورلىق ۇيىمداردىڭ ءتىزىمى بار»، - دەدى ق ر جوعارعى سوتىنىڭ سۋدياسى.
ايتا كەتەيىك، بۇگىن الماتىدا ب ۇ ۇ ەسىرتكى جانە قىلمىس بويىنشا باسقارماسىنىڭ (ە ق ب) «اۋىر جانە ترانسۇلتتىق سيپاتتاعى قىلمىستاردىڭ الدىن الۋ جانە ولارمەن كۇرەس ماقساتىندا مەملەكەتتەردىڭ الەۋەتىن نىعايتۋ» اتتى عالامدىق باعدارلاماسى شەڭبەرىندە قازاقستاننىڭ جوعارعى سوتى مەن ب ۇ ۇ ە ق ب- نىڭ ۇيىمداستىرۋىمەن ايماقتىق سەمينار باستالدى.
سەمينار ءۇش كۇنگە سوزىلادى. جيىنعا قازاقستان، رەسەي، يزرايل، ارمەنيا، ازەربايجان، گرۋزيا، قىرعىزستان، وزبەكستان، تۇركىمەنستاننىڭ جوعارعى جانە باسقا دا سوتتارىنىڭ سۋديالارى جانە ساراپشىلارى قاتىسۋدا.
اۆتور: الماس مۇقاش ۇلى