جۇلدىزاي دۇيسەنبيەۆا: جۇكتى كەزىمدە اكەمنىڭ كوزىنە كورىنبەدىم
بۇل تۋرالى استانا ارناسىنىڭ «انالار» باعدارلاماسىنا سىلتەمە جاساپ Stan.kz حابارلايدى.
ول جاسى وتىزدان اسقاندا تۇرمىس قۇردى، نارەستەلى بولدى. بۇگىندە جولداسى ەكەۋىنىڭ ايانات ەسىمدى قىزدارى بار. ەلدىڭ ەركەسىنە اينالعان جۇلدىزاي بۇگىندە ءبىر اۋلەتتىڭ كەلىنى. دەسە دە ول ەنەنىڭ قولىندا تۇرىپ، كەلىننىڭ «قيىنشىلىعىن» كورمەگەن. جۇلدىزاي اتا- ەنەسىمەن بىرگە نەبارى ەكى كۇن تۇرعان.
«ودان كەيىن ول كىسىلەر اۋىلدا قالدى، ءبىز جولداسىمنىڭ جۇمىسى بويىنشا الماتىعا كەتتىك. ول جاقتاعىلار ماعان اسا قاتال بولىپ جاتقان جوق. ەلدىڭ قىزى بولعاننان كەيىن ول كىسىلەر دە ەركەلەتەدى. اتامىز، ءتىپتى، ەشتەڭە جاساما دەيدى. ەنەم ارتىق ەشتەڭە ايتپايدى. ءتىپتى، تاماقتى ءوزى جاساپ تاستايدى. «وزدەرىڭ 1-2 كۇنگە كەلگەندە قوناق بولىڭدار، وتىرا بەر» دەيدى. ۇيدە كەلىن بار، قاينىلارىم ەرتە ۇيلەنىپ كەتكەن. اسا كوپ قيىندىق كورە قويعان جوقپىن» ، - دەپ ءتۇسىندىردى جۇلدىزاي.
ال ءوز اتا- اناسىنا جۇلدىزاي اشىلىپ سويلەمەيدى.
«بىرەۋلەرگە ادۋىندى، مىنەزدى بولىپ كورىنەتىن شىعارمىن. ءبىراق ءالى كۇنگە دەيىن اكەمە دە، شەشەمە دە تۋرا قاراپ ەشتەڭە ايتا المايمىن. كەيدە ايتىلۋى كەرەك نارسە بولسا، وزىمنەن كەيىنگى سىڭلىلەرىمە ايتقىزىپ جىبەرەمىن.
قازىر جاسىم 35 كە كەلسە دە، پاپاما ارتىق اسىپ ەشتەڭە ايتا المايمىن. مامام وسىندا بولعاندا تەلەفون سوقسا، مامامنان بۇرىن تەلەفوندى دا كوتەرمەيمىن. ول مەنىڭ سىيلاعاندىعىم، قۇرمەتتەگەندىگىم. مەن، ءتىپتى، اياعىم اۋىر كەزدە اكەمنىڭ كوزىنە كورىنبەۋگە تىرىستىم، ءتىپتى كورىنبەدىم. تاربيە سولاي» ، - دەيدى جۇلدىزاي دۇيسەنبيەۆا.