الماتى وبلىسى قىتاي مەن ت م د ەلدەرىنە ەت ەكسپورتتاۋعا دايىن

استانا. قازاقپارات - الماتى وبلىسىنداعى مال بورداقىلاۋ الاڭدارى شەتەلگە ەت ەكسپورتتاۋعا دايىن. شارۋالاردىڭ كوزدەگەنى -  ت م د ەلدەرى مەن قىتاي نارىعىنا شىعۋ.

بۇگىندە ءبىر عانا بالقاش اۋدانىنىڭ وزىندە 5 مىڭ باس ءىرى قارا بورداقىلاۋعا ارنالعان ەكى بىردەي كەشەن جۇمىس ىستەپ تۇر. اۋدان ەلىمىزدەگى ەڭ ءىرى مەگاپوليستىڭ ىرگەسىندە ورنالاسقاندىقتان مۇندا وندىرىلگەن ەت ونىمدەرى نەگىزىنەن الماتى قالاسىنا جونەلتىلەدى.

 بالقاش اۋدانىنىڭ اقدالا اۋىلىنداعى مال بورداقىلاۋ الاڭى 2013 -جىلى پايدالانۋعا بەرىلدى. ءبىر مەزەتتە 5 مىڭ باس ءىرى قارا بورداقىلايتىن بۇل كەشەن وتكەن جىلى تولىق قۋاتىنا كوشتى. ولار ءبىر جىلدىڭ ىشىندە 7 مىڭ باس مال بورداقىلاپ، الماتى مەن قاپشاعاي قالاسىنداعى ءىرى ساۋدا ورتالىقتارىنا 1,5 مىڭ توننا ەت جونەلتكەن.

شاحان اۋعانبايەۆ، كەشەننىڭ اتقارۋشى ديرەكتورى:

- ەندى ءبىزدىڭ كەشەننىڭ مۇمكىنشىلىگى ءوزىمىزدىڭ رەسپۋبليكانىڭ ىشىندەگى ەت ونىمدەرىنە دەگەن سۇرانىستى عانا قاناعاتتاندىرىپ قويماي، بولاشاقتا وسىلاي جۇمىس ىستەي بەرەتىن بولساق، ەت ەكسپورتتاۋ مۇمكىنشىلىگىن قاراستىراتىنداي قۋاتتىلىعىمىز بار. بۇل جاۋاپكەرشىلىگى شەكتەۋلى سەرىكتەستىكتىڭ مال سويۋ سەحىندا تاۋلىگىنە 40-50 باستاي ءىرى قارا باۋىزدالادى. ەت ساقتايتىن توڭازىتقىشى 120 باسقا ارنالعان. قالدىقسىز ءوندىرىس حالال ستاندارتتارىنا ساي جۇمىس ىستەيدى.

 اقايشا تايشىعۇلوۆا، كەشەننىڭ مەڭگەرۋشىسى:

 - 15 ادام جۇمىس ىستەيدى مىنانىڭ ىشىندە. قولمەن باۋىزدالادى، حالال. تەرىسى، باسى، سيراعى، ىشەك- قارنى، وكپە- باۋىرى، الماتىعا كەتەدى. ونى ءوزىنىڭ الاتىن ادامدارى الادى. مۇندا مال نەگىزىنەن الماتى، شىعىس قازاقستان، پاۆلودار وبلىستارىنان اكەلىنەدى.

كەشەندەگىلەر قازاقتىڭ اق باس سيىرى مەن انگۋس، سانتا گەرترۋدا تۇقىمىن بورداقىلاعاندى ءجون كورەدى. ويتكەنى ولار كۇنىنە 1-1,5 كەلىگە دەيىن ەت جينايدى. الاڭ تولىعىمەن اۆتوماتتاندىرىلعان. ورتالىقتاندىرىلعان سۋ جۇيەسى بار. ناۋالار جىلىتىلادى. بەرىلەتىن جەم- ءشوبى تازا. سوندىقتان مۇندا جوعارى ساپالى، تابيعي تازا ەت وندىرىلەدى. شارۋاشىلىق كورشىلەس قىتاي مەن ت م د ەلدەرىنە ءوز ونىمدەرىن ەكسپورتتاۋعا دايىن.

 باۋىرجان دارىبايەۆ، بالقاش اۋداندىق اۋىل شارۋاشىلىعى ءبولىمىنىڭ باسشىسى:

 - بيىلعى جىلى ەلباسىمىزدىڭ جولداعان جولداۋىنا سايكەس، قوسالقى شارۋاشىلىقتاردى دامىتۋ، ۇساق شارۋاشىلىقتاردى بىرىكتىرۋ تۋرالى تاپسىرما بەردى عوي، كووپەراتسيا جونىندە. اۋدان كولەمىندە باقباقتى س پ ك- سى قۇرىلدى. ونىڭ 20 مۇشەسى بار. ول كىسىلەر دە قازىر جۇمىستارىن باستاپ جاتىر.

باقباقتىداعى اۋىل شارۋاشىلىعى كووپەراتيۆىن قۇرعان ازاماتتار 40 ميلليون تەڭگە نەسيە الدى. الماتى وبلىسى بويىنشا الداعى ۋاقىتتا 500 مىڭنان استام ۇساق شارۋاشىلىق بىرىكتىرىلەدى. 600-دەي وتباسىلىق فەرما مەن مال بورداقىلاۋ الاڭى اشىلادى. بالقاش اۋدانىندا «سىباعا»، «قۇلان»، «التىن اسىق» باعدارلامالارى دا ءساتتى جۇزەگە اسۋدا. وڭىردەگى مال شارۋاشىلىعىمەن اينالىساتىن قوجالىقتار وتكەن جىلى 600 ميلليون تەڭگە كولەمىندە سۋبسيديا العان. سونىڭ ارقاسىندا مال باسى ءوسىپ، اۋدانداعى ءىرى قارا سانى 83 مىڭعا جەتتى. 22 مىڭداي جىلقى بار. ال قوي- ەشكى سانى 100 مىڭنان استى.

www.24.kz