يتاليادا جاڭا پىسكەن ناننىڭ ءدامى ۇمىت بولىپ بارادى
اس اتاسىنا سۇرانىس نەلىكتەن ازايدى؟
«كازارەچچو»، «روزەتتا»، «چاباتتا» بولكەلەرى. ريمدەگى بۇل ناۋبايحانادا كۇنىنە 160 ءتۇرلى نان پىسىرىلەدى. سوندىقتان ەلدەگى ۇلتتىق ۇن ونىمدەرىنىڭ بايلىعى تۋرالى ايتۋدىڭ ءوزى ارتىق. الايدا سوڭعى كەزدە حالىقتىڭ نانعا دەگەن سۇرانىسى كۇرت تومەندەپ كەتكەن. بۇرىنعىداي بولكە ءۇشىن ۇزىن- سونار كەزەككە تۇرعان جاندى كورمەيسىز. جاڭا پىسكەن ىستىق ناننىڭ ءدامى ۇمىت قالىپ بارادى.
روبەرتو تاركۋيني، ناۋبايحانا يەسى:
- ءبىزدىڭ ناننىڭ ءدامى قانداي دەسەڭىزشى. سىرا اشىتقىسىنىڭ اشى ءدامى دە بىلىنبەيدى. ەشقانداي حيميالىق قوسپا مەن كونسەرۆانتتار جوق. ءدامى ءتىل ۇيىرەدى. وسىنداي ناندى ءپىسىرۋ ءۇشىن ۋاقىت كوپ جۇمسالادى. باعاسى مەن ساپاسى دا ءبىر- بىرىنە ساي. ەسەسىنە سۋپەرماركەتتەردە ساتىلاتىن بولكە ارزان، ساقتاۋ مەرزىمى دە ۇزاقتاۋ. «ميكروتولقىننان شىققان نان» دەپ اتايدى بۇنى ناۋبايشىلار.
جارتىلاي دايىن ءونىم شىعىس ەۋروپادان مۇزداتىلعان تۇرىندە جەتكىزىلەدى. تاۋاردىڭ وندىرىلگەن جەرى كورسەتىلسە، ساۋداداعى باسەكەلەستىك ادىلىرەك بولادى دەيدى ناۋبايحاناشىلار. كەرى جاعدايدا ۇلتتىق نان ءپىسىرۋ ءداستۇرى قۇردىمعا كەتۋى ىقتيمال. ەكى جىل بۇرىن ريمدە 630 ناۋبايحانا بولاتىن. بۇگىنگى تاڭدا ونىڭ 250 جابىلىپ قالدى.
دجانكارلو دجامباررەزي، ريمنىڭ ناۋبايحانا اسسوتسياتسياسىنىڭ پرەزيدەنتى:
- بۇگىندە نانعا بالاما بولا الاتىن كوپتەگەن تاۋار ءتۇرى ساتىلىمعا شىقتى. جۇمىسباستى ادامدار نان ساپاسىنا كوپ ءمان بەرە بەرمەي، شۇعىل استانىپ العاندى قۇپ كورەدى. نان تۇتىنۋدىڭ كىسى باسىنا شاققانداعى كورسەتكىشى دە تومەندەگەن. ەگەر بۇرىن ءاربىر ادام كۇنىنە شامامەن 200 گرامعا جۋىق ۇن ءونىمىن تۇتىنسا، بۇگىندە 80-90 گرامنان اسپايدى. بولكەنىڭ 100 گرامىنا سۇرانىس دەڭگەيى 50 پايىزعا دەيىن ازايعان. نان ءپىسىرۋ مەن نان تابۋ بۇگىندە تابىسى مول كاسىپكە جاتپايدى. سوندىقتان ناۋبايحاناشى بولۋ ءتيىمسىز بوپ بارادى. بالالار دا اتا- انالارىنىڭ بۇرىننان كەلە جاتقان وتباسىلىق كاسىبىن جالعاستىرۋعا قۇشتار ەمەس. ماماندار تاپشى. ەرەكشە ءداستۇر جويىلۋدىڭ ءسال- اق الدىندا تۇر.
يتاليادا نان ءپىسىرۋدىڭ 400-دەن استام امالى ساقتاۋلى. ەلدىڭ ءار وڭىرىنەن تاپسىرىستار دا كوپتەپ تۇسەتىن. مىسالى «پانە كازارەچچو» مەن ءۇي نانىن ريمدىكتەر جاقسى كورەتىن. ال كولەمى شاعىن چاباتتينامەن ءاربىر يتاليالىق وزدىگىنشە بۋتەربرود جاساي بەرەتىن.
www.24.kz