قازاقستانعا جەل ەلەكتر ستانسالارىن كوبەيتۋ قاجەت - ۋكراينا وكىلى
وندا قازاقستان رەسپۋبليكاسىنداعى ۋكراينا ىستەرىنىڭ ۋاقىتشا سەنىمدى وكىلى ۆولودىمىر دجيدجورا ايتۋلى شاراداعى ۋكرايندىق تاراپتىڭ جوسپارلارىمەن ءبولىستى. سەنىمدى وكىلدىڭ مالىمدەۋىنشە، قازاقستان ۋكراينا جانە ونداعان مەملەكەتكە پاۆيلونعا تەگىن ورنالاسۋعا مۇمكىندىك بەردى.
بۇل مەملەكەتتەر اراسىنداعى كەلىسسوزدەر ناتيجەسىندە جۇزەگە اسقان. «ەكسپو-2017» كورمەسىنە دايىندىق جۇمىستارىمەن ۋكراينانىڭ ەكونوميكالىق دامۋ جانە ساۋدا مينيسترلىگى جانە ۋكراينانىڭ ساۋدا-ونەركاسىپتىك پالاتاسى اينالىسۋدا.
سونىمەن بىرگە، ۋكراينانىڭ ۆيتسە-پرەمەرى گەننادي زۋبكو ۋكراينا سەكتسياسىنىڭ كوميسسارى بولىپ تاعايىندالعان. ۋكراينا پاۆيلونىنىڭ اۋماعى 35 شارشى مەتردى قۇرايدى. مۇندا ۇلكەن ەكران ورناتىلىپ، ۋكراينانىڭ بار مۇمكىندىكتەرى مەديا-تانىستىرىلىم تۇرىندە كورسەتىلەدى. بۇگىنگە دەيىن ۋكراينانىڭ ونداعان كومپانيالارى كورمەگە قاتىساتىندارىن راستادى.
كورمە بارىسىندا ەلەكتر ەنەرگياسىن ءوندىرۋ، تاراتۋ جانە ساقتاۋمەن اينالىساتىن ۋكراينالىق كومپانيا وكىلدەرى ءوز الەۋەتتەرىن كورسەتىپ، سەرىكتەستەرمەن كەلىسسوزدەر جۇرگىزە الادى.
«ۋكراينادا جەل ەلەكتر ءوندىرىسى جاقسى دامىعان. سوندىقتان ، ءبىز جەل جانە كۇن ەنەرگياسىنا قاتىستى قىزىقتى تەحنولوگيالارمەن بولىسە الامىز. مەن قازاقستاننىڭ قاراعاندى، اقتاۋ، پاۆلودار سىندى قالالارىندا بولدىم جانە قازاقستاننىڭ باسىم بولىگىندە جەلدىڭ وتە كوپ ەكەنىن بايقادىم. سوندىقتان، قازاقستانعا جەل قۋاتىن ءوندىرۋدى دامىتا ءتۇسۋ قاجەت»، - دەپ تولىقتىردى ۆ. دجيدجورا.
15- ماۋسىم كۇنى ەكسپو اۋماعىندا ۋكراينانىڭ ۇلتتىق كۇنى وتەدى. وعان قازاقستان حالقى اسسامبلەياسى اياسىندا جۇمىس ىستەيتىن ۋكراين ەتنومادەني بىرلەستىكتەرى، استاناداعى ۋكرايندىق مەيرامحانالار اتسالىسادى. ۇلتتىق كۇنگە ۋكراينا پرەمەر-ءمينيسترى ۆلاديمير گرويسمان ارنايى كەلەدى دەپ كۇتىلۋدە.
ۇلتتىق كۇنمەن بىرگە، پرەمەر-مينيستر ەكى ەلدىڭ كاسىپكەرلەرىنە ارنالعان بيزنەس-سەمينارعا دا قاتىسادى. سەمينارعا جاڭارتىلعان ەنەرگەتيكا سالاسى بويىنشا ۋكرايندىق جانە قازاقستاندىق كاسىپكەرلەر شاقىرىلىپ، ىنتىماقتاستىق ورناتۋ، كەلىسسوزدەر جۇرگىزۋ مۇمكىندىگى بەرىلەدى.
ەكسپو قارساڭىندا ۋكراينادان كەلەتىن جانە وسى ەل ارقىلى ۇشىپ كەلەتىن قوناقتاردىڭ سانى كوبەيەدى. وسىعان وراي، قازاقستان مەن ۋكراينا اراسىنداعى اۋە رەيستەرىنىڭ سانى ۇلعايادى. ودان بولەك، «ەير استانا» اۋە كومپانياسىمەن كيەۆ-استانا باعىتىندا تىكەلەي رەيس اشۋ تۋرالى كەلىسسوزدەر اياقتالۋعا جاقىن.
كورمە كەزىندە «ۋكراينا حالىقارالىق اۋە جەلىلەرى» جانە «ەير استانا» كومپانيالارىنىڭ رەيستەرى اپتاسىنا 7 جانە 5 كۇن ۇشادى دەپ جوسپارلانىپ وتىر. ەسكە سالا كەتسەك، 2017-جىلدىڭ 23- اقپانىندا ەكسپو-2017 كورمەسىنىڭ كوميسسارى ءراپىل جوشىبايەۆ ۋكراينا سەكتسياسى كوميسسارىنىڭ ورىنباسارى سەرگەي ساۆچۋكپەن كەزدەسكەن ەدى.
كەزدەسۋ قورىتىندىسى بويىنشا جوشىبايەۆ پەن ساۆچۋك ەكسپو-2017 حالىقارالىق مامانداندىرىلعان كورمەسىنە ۋكراينانىڭ قاتىساتىنى تۋرالى شارتقا قول قويدى.
اۆتور: ايجان سەرىكجان قىزى