ديماشتىڭ ەكى تىلدە ورىنداعان ءوز ءانى ازيا رەيتينگىنىڭ ۇشتىگىنە ەندى
«ۇمىتىلماس كۇن» د. قۇدايبەرگەننىڭ و. بايسەڭگىردىڭ سوزىنە جازىلعان ءتول تۋىندىسى. ونى ءانشى قازاق جانە قىتاي تىلدەرىندە شىرقادى. اتالمىش كومپوزيتسيا «ازيانىڭ جاڭا اندەرى» رەيتينگىندە 73826 ۇپاي جيناپ، 3-ورىنعا، ال بايقاۋ بارىسىندا ورىنداعان وزگە اندەرى - «All By Myself» پەن «دايديداۋ» سايكەسىنشە 16-ىنشى جانە 29-ورىندارعا يە بولدى.
بۇعان دەيىن ديماشتىڭ «Singe» بايقاۋىنىڭ ءتۇرلى كەزەڭدەرىندە ورىنداعان «قوڭىر كۇز»، «Uptown Funk», «Adagio» مەن «SOS d'un terrien en détresse» اندەرى دە وسى رەيتينگتەن كورىنگەن ەدى.
ايتا كەتەرلىگى، «ازيانىڭ جاڭا اندەرى» رەيتينگىنە ءانشىنىڭ ءبىر مەزگىلدە ءۇش ءانى عانا ەنە الادى. «ازيانىڭ جاڭا اندەرى» رەيتينگى ازيالىق انشىلەردىڭ قىتايداعى تانىمالدىلىعىنا بايلانىستى جاسالىپ وتىرادى.
وندا اندەردىڭ تىڭدالىمى، اقىلى تۇردە جۇكتەپ الىنۋى بويىنشا ۇپايلار بەرىلىپ، رەيتينگ قۇرىلادى. ول ءار 10 مينۋت سايىن جاڭالانىپ، جىل سوڭىندا جىلدىڭ توپ-رەيتينگى جاريالانادى.
ەسكە سالا كەتەيىك، قازاقستاندىق جاس تالانت «Singer» بايقاۋىنىڭ بارلىق 10 ىرىكتەۋ- كەزەڭىنەن ءوتىپ، جالپى ەسەپتە ءبىرىنشى بولىپ فينالعا جولداما الدى. اقتىق باسەكە 8- جانە 15- ءساۋىر كۇندەرى وتەدى.
اۆتور: مۇحتار قاليموللا ۇلى