جىلاندى ءتىرى كۇشىكتەرمەن جانە مىسىقتارمەن ازىقتاندىرعان ايەلدىڭ ۇستىنەن ءىس قوزعالدى
بۇل تۋرالى International Business Times حابارلادى.
ايەل ينتەرنەتكە ءىرى جىلاندى ساتاتىنى تۋرالى حابارلاندىرۋ ورنالاستىرعان. ول حايۋاناتتاردى پانالاتاتىن مەكەمە قىزمەتكەرىنىڭ كوزىنە تۇسەدى. ءبىر قىزىعى، حابارلاندىرۋمەن قوسا جىلاننىڭ كۇشىكتى بۋىندىرىپ جاتقان فوتوسى قوسا سالىنعان. الگى قىزمەتكەر ساتىپ الۋشى رەتىندە حابارلاندىرۋدا كورسەتىلگەن تەلەفون نومىرىنە قوڭىراۋ شالادى. پيتون يەسى وعان جىلانىن ۇدايى ءتىرى مىسىقتارمەن، كۇشىكتەرمەن جانە قۇستارمەن ازىقتاندىراتىندىعىن ايتىپ بەرەدى.
حايۋاناتتاردى پانالاتاتىن مەكەمەنىڭ قىزمەتكەرى بۇل تۋرالى يسپانيا ازاماتتىق گۆاردياسىنىڭ جانۋارلاردى قورعايتىن بولىمىنە حابارلايدى. پيتوننىڭ يەسىن تەرگەۋ جۇمىستارى باستالدى. ايەلگە جانۋارلارعا قاتىگەزدىك كورسەتتى دەگەن كۇدىك كەلتىرىلۋدە. يسپانيانىڭ قىلمىستىق زاڭناماسىندا ءۇي جانۋارلارىنا جازىقسىز زيان كەلتىرسە نەمەسە نەگىزسىز ولتىرسە، ءۇش ايدان ءبىر جىلعا دەيىن تۇرمەگە وتىرعىزۋ جازاسى قاراستىرىلعان.
اۆتور: ەرلان قوجاكەلديەۆ