اقيقات پەن شىندىقتىڭ ايىرماسى قانداي؟
سەبەبى اقيقات دەگەن شىندىق، شىندىق دەگەن اقيقات ەمەس پە؟ وتىرىك پەن جالعان سەكىلدى ەكەۋى سينونيمدەس ۇعىم سەكىلدى. ءبىراق ەكەۋىنىڭ كوكسەگەن ماقساتى مەن ايتارى ەكى باسقا دۇنيە. بۇل قالاي؟ شىندىق دەگەن نە؟ شىندىق - ءار ادامنىڭ ىشىندە بولاتىن، وزىمدىكى دۇرىس دەپ تاپقان، وزگەنىڭ پىكىرىنە بەرىلمەيتىن، كەز كەلگەن تۇلعانىڭ ءوز شىندىعى. شىندىق جالعانعا دا اينالىپ كەتە الادى. ءسوزدىڭ ايتىلۋى عانا شىندىعىن ساقتاپ تۇرماسا، ءاربىر ادامنىڭ شىندىعى اقيقات بولا المايدى. ماسەلەن ءسىز ءوزىڭىز كورگەن دۇنيەنى ايتىپ، ەلدىڭ سەندىرۋگە شاقىراسىز. ول ءسىزدىڭ كورگەن شىندىعىڭىز. ەل كورمەگەن، ەستىمەگەن. ءبىراق ءسىزدىڭ ادامدىق كەلبەتىڭىزگە قاراپ ولار ونى اجىراتادى. نەمەسە «شىن» دەپ سەنەدى. ال ول ءبىر كۇندەرى جالعان دۇنيەگە اينالىپ كەتسە دە تاڭ قالماڭىز. سەبەبى ءسىزدىڭ تۇيگەن دۇنيەڭىز تاعى ءبىر ادامنىڭ تۇيسىگىمەن سايكەس كەلمەۋى مۇمكىن.
اقيقات - ءار ادامنىڭ ءوز شىندىعى ەمەس، جالپىعا ورتاق شىنايى دۇنيە. ءبارى كورگەن، ەستىگەن، بىلگەن، سەزىنگەن دۇنيەسى. ماسەلەن ادامنىڭ ولەتىنى جانە تۋاتىنى اقيقات. اقيقاتتىڭ جولى وتە اۋىر. ول شىندىققا قاراعاندا ۇلكەن جاۋاپكەرشىلىكتى تالاپ ەتەدى. عىلىمي تۇرعىدا الىپ قاراساق، شىندىق - تەوريا، اقيقات - اكسيوما. ياعني، تەوريا بەلگىلى ءبىر كەزەڭدە وزگەرىسكە ۇشىرايدى. ال اكسيوما ەشقاشان وزگەرمەيتىن، جەتى رەت ولشەنىپ ءبىر رەت كەسىلگەن نارسە. اقيقاتقا ۇمتىلۋ اركىمنىڭ ءوز شىندىعىن تۇزەۋگە اسەر ەتەدى. سەبەبى ءاربىر ادام ءوز شىندىعىمەن الەمدى اداستىرىپ الۋى مۇمكىن. سوندىقتان ءاربىر ءىستىڭ، ءسوزدىڭ اقيقات ەكەنىن اڭعارۋ ءۇشىن، اسىعىس شەشىم جاساۋعا بولمايدى. سەنىم ارتقان دۇنيەنىڭ كۇلگە ۇشۋى، ءۇمىتتىڭ اقتالماۋى ادام بالاسى ءۇشىن ۇلكەن كۇيزەلىس. قازاق تىلىندە ماعىنالاس، سينونيمدەس سوزدەر وتە كوپ. ءبىراق ءبارىنىڭ ايتارى ءبىر دەگەن دۇنيە ەمەس. ەسكەرىڭىز، ءبىرىنىڭ كەپەشىن بىرىنە كيگىزۋگە بولمايدى. تىلگە دەگەن قۇرمەتتى دە، ونىڭ ماعىناسىنا دا ءمان بەرۋ ماڭىزدى.
Massaget.kz