باۋىرجان بايبەك الماتىلىقتاردى ناۋرىز مەرەكەسىمەن قۇتتىقتادى - فوتو
«بارشاڭىزعا بەلگىلى كەڭەس كەزەڭىندە ناۋرىزدى تويلاۋعا تىيىم سالىنعان بولاتىن. تەك، 1988 -جىلى ۇلت زيالىلارىنىڭ باستاماسىمەن سول كەزدە مينيسترلەر كەڭەسىنىڭ ءتوراعاسى بولىپ تۇرعان ەلباسى نۇرسۇلتان نازاربايەۆ جان- جاقتى قولداپ، ناۋرىز حالقىمىزبەن قايتا قاۋىشتى. سودان بەرگى ارادا ءاز- ناۋرىز كومەسكىلەنگەن ۇلتتىق رۋحتى قايرادى. سالت ءداستۇرىمىزدى، ۇلتتىق سانانى جاڭعىرتۋعا قىزمەت ەتتى. تاعدىردىڭ تالايىمەن وتانىمىزدى مەكەن ەتكەن، كۇللى ەتنو وكىلدەرىنىڭ دوستىعىن، ەلدىك سەزىمىن، قازاق حالقىنا دەگەن قۇرمەتىن نىعايتتى. ەلباسىمىز ايتقانداي، ناۋرىز بارشا جۇرت تەك جاقسىلىق كۇتەتىن، دوستىق پەن بىرلىكتىڭ مەرەكەسى. ونىڭ يدەيالىق مازمۇنى كولەمدى، تاربيەلىك ءمانى قاراپايىم، تۇسىنىكتى. ءوزارا قامقورلىق كورسەتىپ، قول ۇشىن سوزۋعا باستايتىن ناۋرىز قايىرىمدىلىقتىڭ، يماندىلىقتىڭ بەرەكەسى. ەرتەدە ناۋرىز كۇنى اۋقاتتى جاندار قايىرىمدىلىق جاساپ، ەلگە كومەك قولىن سوزعان. بۇقاراعا تەگىن اس ۇلەستىرگەن. الدىڭعى بۋىن اعالار جاقسى بىلەتىن بۇل يگى ءداستۇر قازىر بىرتىندەپ قايتا جاڭعىرۋ ۇستىندە. بىلتىر الماتىنىڭ 1000 جىلدىق ءداستۇرى اياسىندا قولعا الىنىپ، قانشاما كوپ بالالى جانۇيا قامتىلعان «1000 يگى ءىس» اكسياسىنىڭ تابىستى ءوتۋى قالالىق قازاقستان حالقى اسسامبلەياسى وتكىزەتىن قايىرىمدىلىق شارالارىنىڭ داستۇرگە اينالۋى، بالالار ۇيلەرىنە جاسالاتىن كومەك كولەمىنىڭ جىل سايىن ارتۋى وسى ايتىلعاننىڭ ايعاعى ىسپەتتى»، - دەدى باۋىرجان بايبەك.
ايتا كەتەيىك، الماتىدا بيىل العاش رەت سالتاناتتى شارالار بىردەن ەكى الاڭدا:
«استانا» الاڭى مەن اتلەتتەر اۋىلىندا ءوتىپ جاتىر. «ۇلى دالانىڭ ناۋرىزى» مەرەكەلىك شاراسىنا 700 دەن استام ءارتىس قاتىسۋدا. مەرەكەدە «مۇشەل» اتتى تەاترلاندىرىلعان كورىنىس كورسەتىلىپ، قازاقتىڭ كونەدەن كەلە جاتقان «سامالىق»، «تۇلىك جىرى» اتتى سالت- ءداستۇرلى، ريتۋالدى ءان- جىرلارى ورىندالدى.
اۆتور: الماس مۇقاش ۇلى