قىتايداعى تارباعاتاي جەرىندە ۇلىس كۇنىنە ارنالعان كونسەرت ءوتتى - فوتو
بۇل تۋرالى قىتايدىڭ kazak.ts.cn سايتى حابارلايدى.
تارلان تارباعاتايداعى قاسيەتتى ەمىل وزەنىنىڭ جاعاسىنا جايعاسقان ءدوربىلجىن اۋدانى - ۇزاق تاريحتان بەرى قازاق ۇلتىنىڭ قۇتتى قونىسى، قارا ورداسى بولىپ كەلە جاتقان، تامىر تارتقان اتا مەكەنى. سول بەرەكەلى جەردە جاڭا ءبىر كوكتەمنىڭ سامالى ەسىپ، سامارقاننىڭ كوك تاسى ءجىبىپ، قىس قىرىنان امان شىققان ىرگەلى ەل ناۋرىز مەرەكەسىن دۋماندى شارامەن قارسى الدى.
وسى ءدوربىلجىن اۋدانىنىڭ تاۋىق جىلعى ناۋرىز مەرەكەسىنە ارناعان سالتاناتتى ونەر كەشىنىڭ باستالۋ ساتىندە ءدوربىلجىن اۋدانىنىڭ اكىمى ماقسۇتقان ءجامساپ ۇلى كوپشىلىكتى ناۋرىز مەرەكەسىمەن قۇتتىقتادى.
«ناۋرىز مەرەكەسى - ۇلتىمىزدىڭ ءارى باۋىرلاس ۇلتتاردىڭ ءداستۇرلى مەرەكەسى. جىل باسى، كوكتەم مەرەكەسى، تۋىس- تۋعان، جورا- جولداستار باس قوسىپ، بەرەكەلى داستارحان باسىنا جيلىپ، بەرەكە- بىرلىكتىڭ تۇعىرىن بەكەمدەي تۇسەتىن، جاڭا تىرلىكتىڭ باستالعان كۇنى. ناۋرىز مەرەكەسى بىرلىكتى، تاتۋلىقتى دارىپتەيتىن ۇلتىمىزدىڭ ءداستۇرلى مەرەكەسى»، - دەپ اتاپ ءوتتى.
مەرەكەلىك كونسەرت اۋداندىق ونەر ۇجىمى دايىنداعان «ناۋرىز كەلدى» توپتىق بيىمەن باستالدى. كەش بارىسىندا حالىق اندەرى مەن قازاقتىڭ كونە ساق- تۇركىدەن كەلە جاتقان كۇركىرەمە- كومەي اۋەنى اۋەلەپ، بالدىرعان بيشىلەردىڭ «قامشى» ءبيى، كورەرمەندەردى كۇلكىگە بولەگەن ءازىل، قۇلاق قۇرىشىن قاندىراتىن كۇمبىرلى كۇيلەر ورىندالدى.
وسىلايشا ناۋرىز مەرەكەسىنە ارنالعان دۋماندى ونەر تويى ءوز سالتاناتىمەن جاراسىم تاۋىپ، حالىققا مەرەكەلىك كوڭىل كۇي سىيلاعان كەش بولدى.
اۆتور: باقىتجول كاكەش