نۇرسۇلتان نازاربايەۆ گولوۆكيندى جەڭىسىمەن قۇتتىقتادى
15:25, 20 - ناۋرىز 2017
استانا. قازاقپارات - مەملەكەت باسشىسى نۇرسۇلتان نازاربايەۆ گەنناديي گولوۆكينگە كاسىپقويلار اراسىنداعى بوكستان الەم چەمپيونى اتاعىن قورعاپ قالۋىنا بايلانىستى قۇتتىقتاۋ جولدادى.
بۇل تۋرالى اقوردانىڭ باسپا ءسوز قىزمەتى حابارلادى.
قازاقستان پرەزيدەنتى نۇرسۇلتان نازاربايەۆ گ. گولوۆكيننىڭ قارىمدى قارسىلاسپەن جانتالاسقان جەكپە- جەكتە اسقان شەبەرلىك، قاجىماس قايرات جانە ناعىز سپورتشىعا ءتان مىنەز كورسەتىپ، چەمپيوندىق اتاقتارىن تاعى دا لايىقتى قورعاپ قالعانىن اتاپ ءوتتى.
«سەنىڭ جەڭىسىڭ بارشا قازاقستاندىقتارعا زور قۋانىش سىيلاپ، ولاردىڭ جۇرەگىن ەلىمىزگە جانە وتاندىق بوكس مەكتەبىنە دەگەن ماقتانىش سەزىمىنە بولەدى»، - دەلىنگەن قۇتتىقتاۋدا.
سوڭىندا نۇرسۇلتان نازاربايەۆ گ. گولوۆكينگە مىقتى دەنساۋلىق تىلەپ، سپورتتا جاڭا جەتىستىكتەرگە جەتۋىنە نيەتتەستىك ءبىلدىردى.