باس سانيتارلىق دارىگەر مەيرام كەزىندەگى قاۋىپتى تاعامداردى اتادى
«كوكتەمنىڭ كەلۋىمەن قازاقستاندىقتار ءداستۇرلى تۇردە ۇستەل ۇستىنە الۋان ءتۇرلى تاعامدار اسسورتيمەنتىن قويۋعا تىرىسادى. ياعني كوپتەگەن ۇلتتىق تاعامداردان باستاپ، كونديتەرلىك ونىمدەرگە دەيىن تولتىرادى. الايدا، ەگەر گيگيەنا تالاپتارى ساقتالماسا، وندا مەرەكەلىك ۇستەلدە باس قوسۋ - تاماقتان ۋلانۋعا الىپ كەلۋى مۇمكىن. وسىعان بايلانىستى، ناۋرىز مەيرامىن مەرەكەلەۋ كەزىندە جانە وسى مەيراممەن بايلانىستى دەمالىس كۇندەرى ۋلانۋعا جول بەرمەۋ ءۇشىن گيگيەنالىق تالاپتاردىڭ ساقتالۋىن تاعى دا ەسكە سالا وتىرىپ، كەڭەس بەرەمىن» - دەدى باس مەملەكەتتىك سانيتارلىق دارىگەر جانداربەك بەكشين.
ق ر د س م مالىمەتىنشە، تاعامداردى دايىنداۋ كەزىندە ولاردى ساقتاۋ مەرزىمدەرى مەن تۇتىنۋ ۋاقىتىنا ءمان بەرۋ قاجەت، شيكى جانە دايىن تاعامداردىڭ بىرگە ساقتالۋىنا جول بەرمەڭىز. ال ساپاسىنا ازداپ كۇدىكتەنگەن جاعدايدا، ول تاعامدى تۇتىنۋدان باس تارتۋ كەرەك.
«تاۋىق ەتىنەن جاسالعان دايىن تاعامدار ەڭ ۇلكەن قاۋىپ توندىرەدى، جۇمىرتقا قوسىلعان تاعامدار، مايونەز بەن قايماق قوسىلعان سالاتتار، كرەمى بار كونديتەرلىك ونىمدەر (تورتتار، ءتاتتى ناندار)»، - دەپ اتاپ ءوتتى بەكشين.
ادەتتە، مەرەكە كۇندەرى قوعامدىق تاماقتاندىرۋ نىساندارى مەن ساۋدا ورىندارى ۇلكەن كولەمدە اسپازدىق، سونداي- اق كونديتەرلىك ونىمدەر دايىنداپ پىسىرەدى. وسىعان بايلانىستى، تاماق ونىمدەرىنىڭ ساپاسى مەن قاۋىپسىزدىگىن كۋالاندىراتىن قۇجاتتاردىڭ بولۋىنا، ولاردى ساقتاۋ مەن ساۋدالاۋ شارتتارىنا نازار اۋدارۋ قاجەت.
بۇل تۇرعىدا باس مەملەكەتتىك سانيتارلىق دارىگەر قوعامدىق تاماقتانۋ ورىندارىنداعى قىزمەتكەرلەر جەكە گيگيەنا ەرەجەلەرىن ساقتاۋى تيىستىگىن، مەديتسينالىق تەكسەرۋدەن وتكەن ادامدار عانا جۇمىسقا جىبەرىلەتىندىگىن اتاپ ءوتتى.
«مەرەكەلىك ۇستەلگە دايىن تاعامداردىڭ الدىن الا قويىلماۋىن جانە ولاردىڭ قاجەتتى تەمپەراتۋرالىق رەجىممەن ساقتالۋىن قامتاماسىز ەتۋگە كەڭەس بەرەمىز. دايىن تاعامداردىڭ ساقتالۋ ۋاقىتىن بۇزۋعا جول بەرمەڭىزدەر»، - دەيدى جانداربەك بەكشين.
اۆتور: رۋسلان عابباسوۆ