قازاقستاندا كوكتەمگى مەرزىمدى اسكەري قىزمەتكە شاقىرۋ باستالدى
2017-جىلعى كوكتەمدە قارۋلى كۇشتەرگە، قازاقستان رەسپۋبليكاسىنىڭ وزگە دە اسكەرلەرى مەن اسكەري قۇرىلىمدارىنا 1999-1990-جىلعى 16 مىڭنان استام ازاماتتاردى شاقىرۋ جوسپارلانعان.
اسكەرگە شاقىرىلىم قازاقستان رەسپۋبليكاسى پرەزيدەنتىنىڭ 2017-جىلعى 16- ناۋرىزداعى «مەرزىمدى اسكەري قىزمەتتى وتكەرگەن اسكەري قىزمەتشىلەردى، اسكەري قىزمەتتىڭ بەلگىلەنگەن مەرزىمىن وتكەرگەن اسكەري قىزمەتشىلەردى زاپاسقا شىعارۋ جانە قازاقستان رەسپۋبليكاسىنىڭ ازاماتتارىن 2017-جىلدىڭ ناۋرىز - ماۋسىمىندا جانە قىركۇيەك - جەلتوقسانىندا مەرزىمدى اسكەري قىزمەتكە كەزەكتى شاقىرۋ تۋرالى» جارلىعىنا سايكەس باستالادى.
بيىلعى جىلعى كوكتەمدە مەرزىمدى اسكەري قىزمەتكە 18 بەن 27 جاس ارالىعىنداعى ازاماتتار شاقىرىلۋعا جاتادى. شاقىرىلۋشىلار مەديتسينالىق كۋالاندىرۋ مەن اسكەري قىزمەتكە جارامدىلىعىن انىقتاۋدان وتكىزىلەتىن وزدەرى اسكەري ەسەپكە الىنعان جەرى بويىنشا قورعانىس ىستەرى جونىندەگى باسقارمالار مەن بولىمدەرگە بارۋ قاجەت.
جاساقتاۋ وسىعان دەيىنگى ءتارىزدى بۇرىنعى ايماقتىق قاعيدا بويىندا جۇزەگە اساتىن بولادى. ياعني، شاقىرىلۋشى اسكەري قىزمەتىن وتكەرۋ ءۇشىن باسقا ايماققا جىبەرىلەدى. اسكەر قاتارىنا تولىقتىرىلاتىن جاس ازاماتتاردى ىرىكتەۋ جانە اسكەري بولىمدەرگە تاراتىپ ۇلەستىرۋ كەزىندە ولاردىڭ شاقىرىلىمعا دەيىن العان ماماندىقتارى ەسكەرىلەدى.
شاقىرۋدى ۇيىمداستىرۋ ءتارتىبى مەن مەديتسينالىق كۋالاندىرۋ شارالارى وتكىزۋ ماسەلەلەرىن جەدەل تۇردە شەشۋ ءۇشىن قازاقستان قورعانىس مينيسترلىگىندە وسى كەزەڭ ارالىعىندا ارنايى «جەدەل جەلى» جۇمىس جاسايتىن بولادى. جاۋاپتى لاۋازىمدى تۇلعالار ازاماتتاردىڭ قىزىعۋشىلىعىن تۋدىرعان ساۋالدارىنا جاۋاپ بەرىپ تۇسىندىرەدى.