قازاقستاندا ۇشقىشسىز اپپاراتتار قۇراستىرىلدى

استانا. قازاقپارات - «قازاقستان عارىش ساپارى» ۇلتتىق كومپانياسى ۇشقىشسىز اپپاراتتاردىڭ العاشقى ۇلگىلەرىن قۇراستىرىپ شىقتى.

ۇشاق تيپتەس جانە كوپتەر ۇلگىسىندەگى اپپاتتاردىڭ قۇرال-جابدىقتارى شەتەلدەن ساتىپ الىنسا دا، قازاقستاندىق ماماندار ونىڭ ءبارىن ءوز قولىمەن قۇراستىردى.

وعان قوسا، كومپيۋتەرلىك باعدارلاماسىن دا وزدەرى جازدى، دەپ حابارلايدى قازاقپارات ءتىلشىسى.

وسى ۋاقىتقا دەيىن قازاقستان عارىش ساپارى جەردى قاشىقتان زونداۋ جۇيەسىن ىسكە قوسىپ، عارىشتان سۋرەت تۇسىرەتىن ەكى جەر سەرىگىن ۇشىردى. وسىنىڭ ارقاسىندا سان الۋان مەملكەتتىك ورگاندار ءۇشىن 12 مىڭنان استام فوتوسۋرەت جاسالدى.

ولاردىڭ ىشىندە قورعانىس مينيسترلىگى، توتەنشە جاعدايلار، اۆتوموبيل جولدارى، ازاماتتىق اۆياتسيا كوميتەتتەرى، ەنەرگەتيكا مينيسترلىگى، پروكۋراتۋرا، شەكارا قىزمەتى، ءتىپتى ەسىرتكى بيزنەسىنە قارسى كۇرەس دەپارتامەنتى دە بار.

ەندىگى كەزەكتە «قازاقستان عارىش ساپارى» ۇلتتىق كومپانياسى ۇشقىشسىز اپپاراتتاردى قۇراستىرۋ جۇمىسىن قولعا الدى. سەبەبى ونداي اپپاراتتارعا كوپ شىعىن كەتپەيدى. وعان قوسا، جوعارى ساپالى سۋرەتتەردى جەرگە جاقىن قاشىقتىقتان تۇسىرۋگە مۇمكىندىك بار.

«ەندى، كەيبىر ادامدار دۇكەندە وكتوكوپتەر، كۆادروكوپتەر سياقتى قىتايلىق اپپاراتتار تولىپ تۇر عوي دەپ ايتۋى ابدەن مۇمكىن. ءبىراق ونىڭ بارلىعى - شاعىن قۇرىلعىلار. سوسىن ونداعى قۇرال- جابدىقتار بىزگە قاجەتتى جۇمىستى ورىنداي المايدى. ال ءبىزدىڭ ماماندار قۇراستىرعان اپپاراتتاردا ءۇش بىردەي كامەرا ورناتىلعان. ەكەۋى جوعارى دالدىگى بار كامەرا بولسا، ءۇشىنشىسى - ينفراقىزىل كامەرا. مىنە، وسىنداي قۋاتتىلىقتىڭ ارقاسىندا قاجەتتى جۇمىستى اتقارۋعا بولادى»، - دەيدى «قازاقستان عارىش ساپارى» ۇلتتىق كومپانياسىنىڭ پرەزيدەنتى ەرعازى نۇرعاليەۆ.

ونىڭ ايتۋىنشا، كومپانيادا قۇراستىرىلعان ۇشقىشسىز اپپاراتتاردى ورمان شارۋاشىلىعىندا، مۇناي مەن گاز وندىرىسىندە، ەنەرگەتيكادا، اۋىل شارۋاشىلىعى جەرلەرىن باقىلاۋدا، قورشاعان ورتانى قورعاۋدا، توتەنشە جاعدايلاردىڭ الدىن الۋدا جانە تاعى باسقا كوپتەگەن سالالاردا قولدانۋعا بولادى.

ماسەلەن، قانداي دا ءبىر اپات كەزىندە ۇشقىشسىز اپپارات ينفراقىزىل كامەرانىڭ ارقاسىندا زارداپ شەككەن ادامدى اۆتوماتتى تۇردە ءوزى تاۋىپ، سيگنال بەرىپ وتىرادى. بۇگىندە ءبىر وكتوكوپتەر 50 مىڭ دوللارعا باعالانىپ وتىر. الايدا كومپانيا باسشىلىعى ول اپپاراتتاردى ساتپاي، تاپسىرىستاردى الىپ، قىزمەت كورسەتۋدەن پايدا تابۋدى كوزدەپ وتىر.

اۆتور: ارمان اسقاروۆ