قىزىلجارلىق ستۋدەنتتەر ساباققا جاپپاي ۇلتتىق كيىم كيىپ كەلە باستادى - فوتو
بۇعان اتسالىسقان توعىز شاھارداعى جوعارى وقۋ ورىندارىنىڭ شاكىرتتەرى بۇگىن لەكسيالاردا ءتۇرلى ۇلتتىق كيىمدەرىن كيىپ ءجۇر.
پەتروپاۆلداعى ستۋدەنتتەر جىلداعى ناۋرىز مەرەكەسىن وسىلايشا ەرەكشە اتاپ ءوتۋدى ۇيعارىپتى. ونداعى ماقسات - تەك قازاق حالقىنىڭ عانا ەمەس، وزگە دە ۇلتتاردىڭ كيىمدەرىن ناسيحاتتاۋ. سوندىقتان بولار، كىتاپحانادا ارميان، ۋكراين، ورىس حالقىنىڭ دا كيىمدەرىن كيگەن قىزدار ءجۇر.
بۇل يدەيانى جاستارمەن قوسا، وقىتۋشىلار دا قولداعان. ولاردىڭ بۇگىن كامزول مەن شاپان كيىپ تۇرىپ وتكىزگەن لەكسيالارىن ەشكىم ابەس كورگەن جوق.
قىزىلجار ستۋدەنتتەرىنىڭ بۇل يدەياسىنا استانا، كوكشەتاۋ، پاۆلودار جانە الماتى جاستارى دا قوسىلىپتى. ءسويتىپ، ولار عالامتورعا فوتولارىن سالىپ جاتىر.
«مىنا كوستيۋمدى ءبىر قۇدالىقتا باس قۇدا بولعام، سوندا سىيلاعان. ۇيدە جاتاتىن. ەرتەڭ كيىز ۇيگە كيەمىز تاعى دا»، - دەيدى م. قوزىبايەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىنىڭ وقىتۋشىسى مۇحتار باقتىبايەۆ.