جەردى ەشكىم ارقالاپ اكەتپەيدى - ق ر پرەزيدەنتى

استانا. قازاقپارات - وتاندىق بۇقارالىق اقپارات قۇرالدارىنا سۇحبات بەرگەن مەملەكەت باسشىسى نۇرسۇلتان نازاربايەۆ جەردى ءوز ازاماتتارىمىزعا جەكە مەنشىككە بەرۋدىڭ قاجەتتىلىگى جايىندا ايتىپ بەردى، دەپ حابارلايدى قازاقپارات ءتىلشىسى.

«قازاقتىڭ جەرىنە جانى اشيتىن ەكى قازاق بولسا، ەكەۋىنىڭ ءبىرى مەن شىعارمىن. سەبەبى شەكارامىزدى شەگەلەگەن كەزدە 14 مىڭ شاقىرىمنىڭ ءار مەترى ءۇشىن كۇرەستىك. ەشكىمگە ەشتەڭەنى بەرمەۋ ءۇشىن، بەرسەك، ءدال سوندايدى الۋ ءۇشىن... سوندىقتان جەردى ەشكىم ارقالاپ اكەتپەيدى. مەن بىلەمىن ول قورقىنىش-ۇرەيدىڭ قايدان شىعىپ جاتقانىن. «كورشىلەر جەردى الىپ كەتپەي مە، ويتپەي مە، بۇيتپەي مە» دەيدى. جەردى ماشيناعا، ءيا بولماسا، ۆاگونعا تيەپ، ەشكىم الىپ كەتپەيدى. بۇل - قازاقستاننىڭ جەرى. قازاقستانننىڭ زاڭدارى دا بار. وعان سايكەس، باسقا ادامدارعا جەردى ساتۋعا رۇقسات جوق. سوندىقتان قازىر ءوز ازاماتتارىمىزعا جەكەمەنشىك قۇقىعىن بەرسەك، الايدا سونىڭ ءوزىن الاتىندار جوق بولىپ تۇر عوي، ءالى دە بيزنەس قاتتى قۇلشىنىس تانىتىپ جاتقان جوق»، - دەيدى پرەزيدەنت.

مەملەكەت باسشىسىنىڭ ايتۋىنشا، باتىس ەلدەرىندە اۋىل شارۋاشىلىعى سالاسىندا جەرگە جەكەمەنشىك قۇقىعى كەڭىنەن تاراعان. سەبەبى ءوز كاسىبىن دامىتامىن دەيتىن ينۆەستور الدىمەن جەكە مەنشىگى ءۇشىن الاڭدايدى، ول مەنشىكتىڭ مەملەكەت تاراپىنان قورعالۋىن تالاپ ەتەدى. ايتا كەتەيىك، نۇرسۇلتان نازاربايەۆ بۇگىن جەر سالاسىنداعى رەفورمانىڭ تيىمدىلىگىن قاراپايىم مىسالمەن ءتۇسىندىرىپ بەردى.

اۆتور: ارمان اسقاروۆ